Psonm 60 - Labib An Kreol Seselwa

Lapriyer pour Demann Delivrans

En poenm David pour donn bann lenstriksyon ler i ti fer lager kont Aranm-Naharaim e kont Aranm-Zoba e ler Zoab ti retournen e touy douz mil Edomit dan Vale Disel. Pour sef lakoral. Dapre ler ‘Lis temwannyaz’.

¹ Mon Bondye! Ou'n rezet nou. Ou'n senm dezord parmi nou. Ou'n ankoler kont nou. Me aprezan, retabli nou.

² Ou'n fer later sekwe; ou'n ouver li. Repar bann krevas akoz i pe tranble.

³ Ou'n fer ou pep soufer dan letan dir. Ou'n fer nou bwar diven ki'n soul nou.

⁴ Ou'n donn ou bann fidel en bannyer pour zot sove devan dart lennmi.

⁵ Par ou pwisans, donn nou laviktwar; reponn nou e delivre bann ki ou kontan.

⁶ Depi son sanktyer, Bondye in promet: Avek lazwa, mon pou partaz lavil Sikenm; mon pou diviz vale Soukot.

⁷ Galaad i pour mwan. Manase osi. Efraim i mon kasket. Zida i mon baton komann.

⁸ Moab i mon kivet pour mwan bennyen; mon zet mon sandal lo Edonm. Mon proklanm laviktwar lo pei Filisten.

⁹ Lekel ki pou anmenn mwan dan lavil fortifye? Lekel ki pou kondwir mwan ziska Edonm?

¹⁰ Mon Bondye! Pa ou'n rezet nou? Mon Bondye! Ou nepli sorti pour konbat avek nou larme.

¹¹ Sekour nou kont lennmi; sekour imen napa valer.

¹² Avek Bondye, nou pou ganny gran laviktwar. Li menm ki pou kraz nou bann lennmi.