Psonm 6 - Labib An Kreol Seselwa

Lapriyer pour Demann Led dan Letan Maler

Psonm David, pour sef lakoral, avek bann lenstriman wit lakord.

¹ SENYER! Ou ankoler kont mwan; me pa pini mwan. Ou fatige avek mwan; me pa pini mwan.

² Pran pitye pour mwan, SENYER! Mon pe deperi; Geri mwan SENYER! Mon lekor antye pe tranble.

³ Mon lespri osi i trouble. SENYER! Konbyen letan mon pou espere?

⁴ Retournen SENYER! Delivre mwan. Akoz ou fidelite SENYER, sov mwan!

⁵ Apre lanmor, dimoun nepli mazin ou. Lekel ki pou loue ou dan lemonn lanmor?

⁶ Mon fatige afors plennyen. Tou le swar, mon lili i mouye avek mon larm; afors mon plere, mon lili i tou tranpe.

⁷ Mon lizye i anfle avek sagren, mon nepli war kler akoz mon bann lennmi.

⁸ Zot ki fer sa ki mal! Ale, les mwan trankil, akoz SENYER in antann mwan plere.

⁹ SENYER in antann mon siplikasyon. SENYER in ekout mon lapriyer.

¹⁰ Tou mon bann lennmi pou onte e zot pou per; zot pou rekile, en sel kou, kouver avek laont.