Psonm 56 - Labib An Kreol Seselwa

Lapriyer Konfyans dan Bondye

Pour sef lakoral. Lo ler ‘Kolonm i lwen dan pye dibwa.’ Poenm David ler bann Filisten ti kaptir li Gat.

¹ Mon Bondye! Pran pitye pour mwan; dimoun pe pourswiv mwan. Tou le zour zot atak mwan e zot kraz mwan.

² Dan son lafyerte, mon lennmi pe pourswiv mwan. En kantite zot pe atak mwan. Bondye liniver!

³ Kan mon per, mon met mon konfyans dan ou.

⁴ Mon loue Bondye akoz son parol. Mon met mon konfyans dan li; mon pa per. Ki en imen i kapab fer mwan?

⁵ Tou le zour zot tourmant mwan avek parol blesan. Zot mazin zis fer mwan ditor.

⁶ Ansanm, zot kasyet pour espyonn lo mwan. Zot vey mon bann mouvman. Zot pare pour pran mon lavi.

⁷ Fer zot peye pour sa bann krim. Mon Bondye! Dan ou lakoler, kraz sa bann zans.

⁸ Ou konnen kantite fwa ki mon ti oblize sove. Ou konnen ki kantite larm mon'n verse. Tousala in ekri dan ou gran liv.

⁹ Alor, zour mon pou apel ou, mon bann lennmi pou rekile. Mon konnen ki Bondye i lo mon kote.

¹⁰ Mon loue Bondye akoz son parol. Mon sant louanz SENYER, akoz son parol.

¹¹ Mon'n met mon konfyans dan Bondye; mon pa per. Lekel sa imen ki kapab fer mwan ditor?

¹² Mon Bondye! Mon pou tenir mon promes. Mon pou ofer ou bann sakrifis remersiman.

¹³ Ou'n delivre mwan dan lanmor e ou'n anpes mwan tonbe. Alor, mon kapab mars devan Bondye, dan lalimyer ki donn lavi.