Psonm 55 - Labib An Kreol Seselwa

Lapriyer En Dimoun ki'n Ganny Trai par En Zanmi

En poenm David. Pour sef lakoral. Avek bann lenstriman lakord.

¹ Mon Bondye! Ekout mon lapriyer. Pa detourn ou vizaz devan mon siplikasyon.

² Port atansyon lo mwan, reponn mwan. Mon nepli konnen sa ki mon dir. Mon divage

³ akoz lennmi pe kriy avek mwan, bann malfeter pe ensilte mwan. Zot fer maler tonm lo mwan, zot atak mwan avek lakoler.

⁴ Mon leker i sere dan mon pwatrin, mon per konmsi mon pe al mor.

⁵ Mon vreman per e mon tranble; lafreyer lanmor in sezi mwan.

⁶ Alor mon dir: Si mon ti annan lezel en pizon, mon ti ava anvole pour rod en landrwa repo.

⁷ Vreman, mon ti pou al byen lwen. Mon ti pou al reste dan dezer.

⁸ Mon ti ava depese pour mwan trouv en labri kont divan vyolan e kont move tan.

⁹ SENYER! Konfiz plan mon bann lennmi. Met divizyon parmi zot, akoz mon war vyolans ek konfli dan lavil.

¹⁰ Lizour koman aswar, zot fer letour bann miray; dan lavil, i annan zis malis ek troub.

¹¹ Dimoun i ganny touye dan lavil; vyolans ek tronpri pa kit landrwa piblik.

¹² Si en lennmi ti pe boufonn mwan, mon ti ava kapab siporte. Si en ladverser ti pe atak mwan, mon ti ava kapab evit li.

¹³ Me se ou ki mon egal, mon dalon, mon prop zanmi!

¹⁴ Ansanm, nou ti partaz lanmitye. Nou ti mars ansanm ver tanp Bondye.

¹⁵ Mon swet lanmor lo mon bann lennmi. Fer zot desann vivan dan lemonn lanmor! Annefe, mesanste i dan zot lakaz e dan zot leker.

¹⁶ Mwan, mon kriy ver Bondye, e SENYER pou vin sov mwan.

¹⁷ Bomaten, midi, aswar mon boulverse, mon plennyen. I ava antann mon lavwa.

¹⁸ I pou delivre mwan e gard mwan sen e sof, dan lager ki mon pe fer, akoz i annan en kantite lennmi kont mwan.

¹⁹ Bondye ki rennyen depi touzour pou antann mwan e i pou imilye zot. Zot pa pou sanze, zot napa respe pour Bondye.

²⁰ Sa enn ki ti mon dalon in atak en zanmi; i pa'n tenir son promes.

²¹ Son parol i pli dou ki dimyel; me i annan lager dan son leker. Son bann parol ti glise, parey delwil; me an realite, zot ti koman en pwannyar.

²² Desarz tou ou fardo lo SENYER, i pou soutenir ou. Zanmen i pou les en zis tonbe.

²³ Me ou, Mon Bondye! Ou ava fer sa bann malfeter desann dan lemonn lanmor. Sa bann kriminel, sa bann tret pa pou viv lanmwatye zot lavi. Me mwan, mon kont lo ou.