Psonm 51 - Labib An Kreol Seselwa

Lapriyer pour Demann Pardon

Psonm David ler profet Natan ti vin war li, apre ki David ti'n al kot Batseba. Pour sef lakoral.

¹ Mon Bondye! Dan ou gran fidelite, pran pitye pour mwan. Dan ou gran konpasyon, efas mon pese!

² Lav mwan e retir mon bann fot. Pirifye mwan e anlev tou mon pese.

³ Mon rekonnet mon bann tor e mon pese i touzour devan mwan.

⁴ Kont ou, kont zis ou ki mon'n fer sa ki mal; devan ou ki mon'n fer sa. Alor, ou annan rezon kan ou pronons ou santans e zizman ki ou rann i zis.

⁵ Depi zour mon nesans, mon dan pese. Mon manman ti fer mwan dan pese.

⁶ Me ou kontan laverite ki dan fon leker. Alor, dan pli profon mon leker, fer mwan konn lasazes.

⁷ Pirifye mwan avek brans izop e mon ava prop. Lav mwan e mon ava vin pli blan ki lannez.

⁸ Rann mwan lazwa e gou pour viv e mon bann lezo ki ou'n kase ava rezouir.

⁹ Pa get tou sa bann pese ki mon'n fer; efas tou mon bann fot.

¹⁰ Mon Bondye! Kree dan mwan en leker pir; Redonn mwan en lespri nouvo.

¹¹ Pa rezet mwan lwen avek ou; pa retir ou Lespri dan mwan.

¹² Redonn mwan lazwa ou delivrans e en lespri zenere ava soutenir mwan.

¹³ Alor, mon ava ansenny bann ki rebel e bann peser ava retourn ver ou.

¹⁴ Mon Bondye! Sov mon lavi. Mon Bondye! Ou menm mon liberater. Alor, dan lazwa, mon ava proklanm ou delivrans.

¹⁵ SENYER! Ouver mon labous e mon ava sant ou louanz.

¹⁶ Ou pa pran okenn plezir dan sakrifis, menm si mon ofer ou en sakrifis konplet.

¹⁷ Sakrifis ki Bondye i oule, i en leker brize; Bondye pa zanmen rezet en leker konpletman brize.

¹⁸ Fer sa ki bon pour Siyon. Rekonstri bann miray Zerizalenm.

¹⁹ Alor ou ava aksepte bann sakrifis ki ou demande, bann lofrann ek bann sakrifis konplet. Alor, nou ava kapab ofer bann toro lo ou lotel.