Psonm 48 - Labib An Kreol Seselwa

Siyon, Lavil Bondye

En kantik, en psonm sorti kot bann garson Kore.

¹ SENYER i gran. Dan lavil nou Bondye, son montanny sakre, i merit tou louanz.

² Montanny Siyon, lavil gran lerwa dan Nor, i en lavil elegan. I fer lazwa lo later antye.

³ Bondye ki asir sekirite dan lavil i en fortres.

⁴ Bann lerwa ti fer konplo ansanm kont montanny Siyon.

⁵ Ler zot ti war SENYER, zot ti sezi; zot ti per e zot ti sove.

⁶ Zot ti tranble parey en fanm dan douler lanfantman;

⁷ parey ler en divan sorti dan Les, i kraz bann gro bato sorti Tarsis.

⁸ Sa ki nou ti'n antann dir, nou'n osi war dan lavil SENYER liniver, dan lavil nou Bondye ki i'n etabli solid pour touzour.

⁹ Mon Bondye! Dan ou tanp, nou mazin ou fidelite.

¹⁰ Mon Bondye! Ou non ek ou grander i ganny selebre partou lo later. Ou ranpli avek lazistis.

¹¹ Montanny Siyon i dan lazwa, bann lavil Zida i selebre, akoz ou bann zizman.

¹² Fer letour miray Zerizalenm e kont son bann tour defans.

¹³ Admir son bann miray, kontanple son bann pale. Konmsa ou ava kapab rakont prosen zenerasyon

¹⁴ ki sa Bondye i nou Bondye pour touzour; i pou gid nou pour touzour.