Psonm 45 - Labib An Kreol Seselwa

Poenm pour Maryaz En Lerwa

Pour sef lakoral, dapre sanson Lis; sorti kot bann garson Kore. En romans.

¹ Mon leker i deborde avek zoli parol. Mon dedye mon poenm pour lerwa. Mon lalang i parey plim en bon poet.

² Ou pli zoli parmi bann zonm; ou koz avek elegans. Pour sa rezon, Bondye in beni ou pour touzour.

³ Brav gerye! Atas ou lepe lo ou kote! Sa i fer ou grander ek ou loner.

⁴ Dan ou mazeste, mont lo ou seval ver laviktwar pour defann laverite, labonte, lazistis. Montre ou pwisans par ou bann gran aksyon.

⁵ Ou bann dart i byen fite pour pers leker ou bann lennmi. Bann nasyon i tonbe anba ou.

⁶ Pei ki Bondye in donn ou pou gouvernen, pou egziste pour touzour. Ou baton rwayal i en baton ladrwatir.

⁷ Ou kontan lazistis e ou deteste sa ki mal. Pour sa rezon, Bondye, ou Bondye, in vers delwil lonksyon lo ou latet. In prefer swazir ou parmi lezot lerwa.

⁸ Ou lenz i santi loder lesans aloes ek kannel. Depi dan ou pale dekore avek livwar, zoli lanmizik i fer ou lazwa.

⁹ Parmi bann fiy i annan bann prenses. Larenn i debout lo ou kote drwat avek lor sorti Ofir.

¹⁰ Mon fiy! Regarde e ekout byen. Oubliy ou pep ek ou fanmir.

¹¹ Lerwa pou admir ou labote. In vin ou senyer; rann li loner ki i merite.

¹² Alor, zabitan Tir! Bann dimoun ki pli ris parmi bann nasyon pou sedwir ou avek toudsort kalite kado.

¹³ Fiy lerwa in antre, son rob brode avek lor.

¹⁴ Dan bann rob tou kouler, i pe ganny kondwir ver lerwa. Bann fiydoner, son bann konpanny, i swiv li.

¹⁵ Ler zot antre dan pale lerwa, bann sanson lazwa i akonpanny zot.

¹⁶ Bann garson lerwa pou okip tronn ou bann zanset. Ou pou fer zot vin bann sef lo later.

¹⁷ Mon pou fer rapel ou non dan tou bann zenerasyon. Alor, tou bann pep ava loue ou pour touzour.