Psonm 38 - Labib An Kreol Seselwa

Lapriyer En Dimoun ki pe Soufer

En psonm David pour en lofrann remersiman.

¹ SENYER! Dan ou lakoler pa kondann mwan. Koriz mwan me pa avek lakoler.

² Ou'n transpers mwan avek ou bann dart, ou lanmen in kraz mwan.

³ Akoz ou lakoler, mon lekor pa byen. Akoz mon bann pese, mon lekor antye i malad.

⁴ Mon bann fot in kouver mwan; zot in vin en fardo tro lour pour mwan.

⁵ Akoz mon bann betiz, mon bann boubou i pi e enfekte.

⁶ Mon kourbe avek douler; mon plere tou lazournen dan lapenn.

⁷ Mon lekor i brile avek lafyev, tou mon lezo i fermal.

⁸ Mon nepli annan lafors, mon'n kase; mon ronfle avek douler dan mon leker.

⁹ SENYER! Ou konn byen tou mon dezir; ou antann mon bann soupir.

¹⁰ Mon ganny palpitasyon, mon lafors pe kit mwan, mon lizye pe vin sonm.

¹¹ Mon bann zanmi ek mon bann vwazen i reste lwen avek mwan akoz mon maladi. Mon fanmir nepli frekant mwan.

¹² Sa bann ki swet mon lanmor zot met zot latrap. Sa bann ki anvi mon maler pe fer mannyer pour detri mwan. Tou lazournen zot dir dimal lo mwan.

¹³ Me mon fer sourdorey; mon pa antann. Parey en kozpa, mon pa dir nanryen.

¹⁴ Mon parey en dimoun ki pa antann e okenn repons pa sorti dan son labous.

¹⁵ SENYER! Mon kont lo ou. SENYER, mon Bondye! Ou ki pou reponn mwan.

¹⁶ Mon demann ou: Pa les zot riy mwan! Pa les zot rezoui kan mon fer en fo pa.

¹⁷ Annefe, mon pre pour mwan tonbe; mon douler pa kit mwan.

¹⁸ Mon rekonnet mon fot, mon regret mon pese.

¹⁹ Mon bann lennmi, zot byen portan e for; en kantite parmi zot pe ay mwan san rezon.

²⁰ Sa bann ki rann dimal pour dibyen, zot akiz mwan akoz mon esey fer sa ki byen.

²¹ SENYER! Pa abandonn mwan. Mon Bondye! Pa reste lwen avek mwan.

²² SENYER! Mon Sover. Pa tarde pou sekour mwan.