Psonm 32 - Labib An Kreol Seselwa

Konfesyon ek Pardon

Psonm David. En lenstriksyon.

¹ Byennere bann ki zot fot i ganny pardonnen, e bann ki zot pese i ganny oubliye!

² Zot byennere bann ki SENYER i konsider inosan e ki napa okenn lespri tronper!

³ Tan ki mon pa ti konfes mon pese, mon ti napa lafors e mon ti plennyen tou lazournen.

⁴ Lizour koman aswar, ou lanmen ti pini mwan. Mon lafors ti'n zis evapore konmsi anba soley sezon lasaler.

⁵ Me, mon'n avoue mon pese avek ou; mon pa'n kasyet mon fot. Mon ti dir: Mon pou konfes mon pese avek SENYER. Alor, ou ti pardonn mwan mon pese.

⁶ Alor, sa enn ki fidel anver ou, ava priy ou dan letan bezwen. Menm si bann gran delo i deborde, zot pa pou ariv kot li.

⁷ Ou en labri pour mwan; ou prezerv mwan kont maler. Ou antour mwan avek bann sanson delivrans.

⁸ Mon pou ansenny ou. Mon pou montre ou ki semen ou pou swiv. Mon pou konsey ou; mon lizye pa pou kit ou.

⁹ Pa fer parey en seval oubyen en bourik bet ki bezwen en mor ek en labrid pour kontrol zot lelan.

¹⁰ Bann malfeter pou konn bokou soufrans. Me fidelite SENYER i antour sa enn ki met son konfyans dan li.

¹¹ Zot ki zis! Rezouir dan SENYER. Zot ki leker i drwat! Sant zot lazwa.