Psonm 31 - Labib An Kreol Seselwa

Lapriyer Konfyans dan Bondye

Psonm David. Pour sef lakoral.

¹ SENYER! Mon'n ganny labri kot ou. Pa zanmen les mwan ganny imilye. Dan ou lazistis, delivre mwan!

² Ekout mwan! Delivre mwan. Ou menm mon Ros protekter, mon fortres ki protez mwan.

³ Vreman! Ou menm mon Ros protekter e mon fortres. Akoz ou non i gran, kondwir mwan e gid mwan.

⁴ Ou pou delivre mwan dan latrap ki'n ganny mete pour mwan, akoz ou menm mon fortres.

⁵ Mon plas mon lavi dan ou lanmen. Ou'n delivre mwan, SENYER, Bondye fidel.

⁶ Mon deteste bann ki ador zidol initil; me mon met mon konfyans dan SENYER.

⁷ Mon rezoui e mon dan lazwa akoz ou fidelite, akoz ou'n war mon lapenn, ou'n konpran mon detres.

⁸ Ou pa'n livre mwan dan lanmen mon lennmi. Ou'n rann mwan lib.

⁹ Pran pitye pour mwan, SENYER! Mon dan langwas. Mon lizye, mon lagorz ek mon vant i brile avek sagren. Mon lekor antye in karyate.

¹⁰ Mon lavi pe fini dan langwas; mon bann lannen i fini dan plere. Akoz mon bann pese, mon perdi kouraz. Menm mon bann lezo in large.

¹¹ Mon bann lennmi i ensilte mwan; mon bann vwazen i mepriz mwan; mon fer per bann ki konn mwan. Ler zot war mwan dan semen, zot sove.

¹² Mon'n ganny oubliye parey en dimoun mor. Mon'n vin en lobze initil.

¹³ Mon antann zot fer kalonmni lo mwan; lafreyer i partou otour mwan. Zot tou, zot in groupe kont mwan; zot pe fer konplo pour touy mwan.

¹⁴ Me mwan, mon'n met mon konfyans dan ou, SENYER. Mon dir: Ou menm mon Bondye.

¹⁵ Mon bann zour i dan ou lanmen. Delivre mwan dan lanmen mon bann lennmi ki persekit mwan.

¹⁶ Fer ou regar briye lo mwan, ou serviter; dan ou fidelite, sov mwan.

¹⁷ SENYER! Pa les mwan ganny dezapwente, akoz mon'n kriy ver ou; me imilye mon bann lennmi. Fer bann malfeter desann an silans dan lemonn lanmor.

¹⁸ Ferm labous sa bann manter ki koz avek ensolans, avek larogans ek mepri kont bann ki zis.

¹⁹ SENYER! Ou rezerv ou gran labonte pour sa enn ki montre respe anver ou. Ou protez bann dimoun ki met zot konfyans dan ou.

²⁰ Ou kasyet zot dan sekirite ou prezans. Ou kasyet zot kont konplo zot bann lennmi.

²¹ Loue SENYER! I'n montre mwan son gran fidelite, mwan ki ti parey en lavil anserkle.

²² Dan mon dezespwar mon ti pe dir: Ou'n zet mwan lwen avek ou. Me ou'n antann mon siplikasyon kan mon ti kriy ver ou.

²³ Zot son bann fidel! Kontan SENYER. SENYER i protez sa enn ki fidel anver li; me i fer bann arogan pey doub.

²⁴ Zot tou, ki met zot konfyans dan SENYER pran kouraz, reste for!