Psonm 25 - Labib An Kreol Seselwa

Lapriyer pour Demann Gidans ek Proteksyon

Psonm David.

¹ SENYER! Mon vin kot ou.

² Mon Bondye! Mon'n fer ou konfyans; pa tronp mwan. Pa les mon bann lennmi ganny laviktwar.

³ Pa les sa ki'n met zot konfyans dan ou ganny tronpe. Me fer onte sa enn ki trai ou san rezon.

⁴ SENYER! Fer mwan konn ou semen. Ansenny mwan viv koman oule.

⁵ Gid mwan, ansenny mwan dan ou laverite. Ou menm Bondye ki sov mwan. Mon kont lo ou tou le zour.

⁶ SENYER! Pa oubliy ou konpasyon ek ou fidelite ki ou'n touzour montre.

⁷ Oubliy bann pese ek bann fot dan letan mon lazenes. Dan ou fidelite, mazin mwan akoz ou telman bon, SENYER.

⁸ SENYER i bon e zis, i remet bann peser lo bon semen.

⁹ I gid dimoun senp lo semen lazistis; i ansenny zot son lavolonte.

¹⁰ Dan tou son santye, SENYER i montre fidelite ek lwayote anver tou bann ki gard son lalyans ek son bann regleman.

¹¹ SENYER! Pour loner ou non, pardonn mwan bann gro pese ki mon'n fer.

¹² SENYER pour montre sa enn ki annan respe pour li, ki semen pou pran.

¹³ I pou viv touzour dan prosperite e son bann desandan pou posed sa pei.

¹⁴ SENYER i konfye son bann sekre avek sa enn ki obei li. I ava fer li konn son lalyans.

¹⁵ Mon touzour tourn mon lizye ver SENYER, akoz i pou delivre mwan dan danze.

¹⁶ Tourn ver mwan SENYER! Pran pitye pour mwan, akoz mon tousel e mon malere.

¹⁷ Liber mwan dan mon langwas; delivre mwan dan mon detres.

¹⁸ Get mon lanmizer ek mon lapenn e pardonn mwan tou mon bann pese.

¹⁹ Get sa kantite lennmi ki mon annan; zot annan en laenn vyolan kont mwan.

²⁰ Protez mwan! Delivre mwan! Mon'n met mon konfyans dan ou. Pa fer mwan onte.

²¹ Mon kont lo ou; gard mwan san repros e touzour onnet.

²² Mon Bondye! Sov pep Izrael! Delivre li dan tou son tourman.