Psonm 21 - Labib An Kreol Seselwa

Remersiman pour Laviktwar

Psonm David. Pour sef lakoral.

¹ SENYER! Lerwa i dan lazwa akoz ou for. I tre zwaye ou'n sekour li.

² Ou'n satisfer dezir son leker; ou pa'n refiz li sa ki i ti demann ou.

³ Ou'n akey li avek bokou benediksyon; ou'n poz en kouronn lor lo son latet.

⁴ I ti demann ou lavi e ou'n donn li; en lavi ki dire pour lontan e touzour.

⁵ Gras a ou led, son laglwar in vin gran; i'n ganny kouver avek splander ek mazeste.

⁶ Ou akord li benediksyon pour touzour; ou prezans in donn li lazwa.

⁷ Lerwa i met son konfyans dan SENYER. I pa pou tonbe, akoz lanmour fidel Bondye Treo.

⁸ Ou pou met lanmen lo tou ou bann lennmi. Par ou lafors ou pou atrap sa bann ki annan laenn pour ou.

⁹ Zour ou pou aparet, ou pou fer zot vin parey en gran dife. Dan son gran lakoler, SENYER pou anval zot e sa gro dife pou detri zot.

¹⁰ I pou fer disparet zot desandans lo later ek zot posterite parmi zabitan later.

¹¹ Si lennmi i rod fer ou dimal, si i prepar en move kou kont ou, i pa pou reisi.

¹² Ou ava tir ou bann fles kont zot, e fer zot sove.

¹³ Leve avek ou pwisans SENYER! Nou pou sante, nou pou loue ou lafors par en psonm.