Psonm 2 - Labib An Kreol Seselwa

Lerwa ki Bondye in Swazir

¹ Akoz bann nasyon i fer konplo? Akoz bann pep i fer bann plan initil?

² Bann lerwa lo later, zot pran zot pozisyon; bann dirizan, zot fer konplo ant zot kont SENYER ek sa enn ki i'n swazir. Zot dir:

³ Annou kas bann lakord e rezet zot bann lasenn.

⁴ Depi son tronn dan lesyel kot i asize, SENYER i riye, i pa pran ka.

⁵ Dan son lakoler, i pou reprimann zot. Dan son gran lakoler i pou fer zot tranble. I pou dir zot:

⁶ Mwan ki'n etabli mon lerwa lo Siyon, mon montanny sen.

⁷ Mon pou proklanm bann regleman SENYER. I ti dir mwan: Ou mon garson; ozordi mon'n vin ou papa.

⁸ Demann mwan, e mon ava donn ou tou nasyon e later antye ava vin ou propriyete.

⁹ Ou pou diriz zot avek en baton an fer; ou pou kas zot an morso parey en po later.

¹⁰ Bann lerwa! Azir avek lasazes. Bann dirizan later! Ekout sa lavertisman.

¹¹ Servi SENYER avek respe. Rezoui dan limilite;

¹² rekonnet son garson; pangar i pran lakoler e ki ou mor dan semen. Akoz son lakoler i mont fasilman. Byennere sa enn ki met son konfyans dan SENYER.