Psonm 17 - Labib An Kreol Seselwa

Lapriyer en Inosan

Lapriyer David.

¹ SENYER! Ekoute! Mon kriy ver ou pour lazistis. Port mon lapenn! Ekout mon lapriyer ki sorti dan en leker senser.

² Rann zizman dan mon faver. Gete ki kote ki vre.

³ Ou konn fon mon leker. Dan lannwit ou'n vey lo mwan. Menm si ou'n teste mwan, ou pa'n war nanryen mal. Dan mon labous pa'n sorti nanryen ki move.

⁴ Mon pa'n dir nanryen kont lezot; mon'n obei ou komannman; mon pa'n swiv semen dimoun ki vyolan.

⁵ Mon'n reste lo semen ki ou'n montre mwan; mon lipye pa'n zanmen glise.

⁶ Mon apel ou, mon Bondye, akoz mon konnen ki ou pou reponn mwan. Donn mwan ou latansyon, ekout mon lapriyer.

⁷ Montre mwan ou fidelite. Ou ki sov bann ki vin pran refiz kot ou, kont zot bann ladverser.

⁸ Gard mwan koman kannet ou lizye. Kasyet mwan anba lonbraz ou lezel,

⁹ kont bann malfeter ki oule atak mwan; kont bann lennmi mortel ki antour mwan.

¹⁰ Zot leker i san okenn pitye. Zot labous i koz avek larogans.

¹¹ Zot in swiv mwan, la zot antour mwan. Zot pe veye pour zet mwan ater.

¹² Zot parey en zenn lyon ki'n kasyet dan brousay, parey en lyon ki'n pare pour devore.

¹³ Leve SENYER! Konfront zot. Fer zot tonbe. Avek ou lepe, liber mwan kont mon bann lennmi.

¹⁴ SENYER! Dan ou pwisans, sas zot lo ou later, lwen avek bann zabitan lemonn. Sanmenm sa par ki zot merite dan sa lavi. Fors zot manz sa ki ou'n rezerve pour zot. Zot bann zanfan ava rasazye e gard en pe pour zot bann pti zanfan.

¹⁵ Me mwan, mon pou war ou lazistis. Kan mon pou leve, mon pou pran plezir kontanple ou.