Psonm 144 - Labib An Kreol Seselwa

Remersiman pour Laviktwar

Psonm David.

¹ Mon loue SENYER, mon Ros protekter. I prepar mon lanmen pour lager. I prepar mon bann ledwa pour konba.

² I mon byenfeter, mon fortres, mon labri, mon liberater, mon boukliye ki donn mwan proteksyon. I fer mon pep soumet anba mon pouvwar.

³ SENYER! Ki valer en et imen i annan pour ki ou enterese avek li? Ki en mortel i ete pour ki ou pran ka avek li?

⁴ I zis parey en divan; bann zour son lavi i parey en lonbraz ki vit pase.

⁵ SENYER! Bes ou lesyel e desann. Tous bann montanny e lafimen ava kouver zot.

⁶ Lans bann zekler e fer ou bann lennmi fannen. Lans ou bann dart e fer zot sove.

⁷ Depi lesyel, lev ou lanmen; delivre mwan e sov mwan dan sa gran kouran delo, dan lanmen bann etranze.

⁸ Zot labous i koz zis mansonz e zot servi zot lanmen drwat pour fer fo serman.

⁹ Mon pou sant en nouvo kantik pour ou, mon Bondye; mon pou zwe pour ou lo laarp dis lakord.

¹⁰ Ou ki donn lerwa laviktwar, ki sov David ou serviter.

¹¹ Sov mwan; delivre mwan dan lanmen bann etranze. Zot labous i koz zis mansonz. Zot servi zot lanmen drwat pour fer fo serman.

¹² Konmsa, nou bann garson ava parey bann pye dibwa ki'n pouse depi zot ti pti. Nou bann fiy ava parey kolonn skilpte ki soutenir en pale.

¹³ Nou bann grennyen i plen avek tou kalite prodwi; nou bann troupo mouton i ogmant en kantite, par dizenn milye dan nou bann laplenn.

¹⁴ Nou bann bef i plenn e napa okenn difikilte met ba. Nou pa antann okenn kriye dan landrwa piblik.

¹⁵ I byennere sa pep ki annan tousala! I byennere sa pep pour ki Bondye i SENYER!