Psonm 143 - Labib An Kreol Seselwa

Lapriyer pour Demann Sekour

Psonm David.

¹ SENYER! Ekout mon lapriyer. Dan ou fidelite, port atansyon lo mon bann siplikasyon. Dan ou bonte, reponn mwan.

² Pa ziz ou serviter, akoz napa personn ki zis devan ou.

³ Mon bann lennmi i pourswiv mwan. Zot in kraz mon lavi ater e zot in fer mwan asiz dan fernwanr parey dimoun ki'n mor depi lontan.

⁴ Mon nepli annan kouraz, mon leker i dan dezespwar.

⁵ Mon mazin letan pase; mon medit lo ou bann mervey; mon reflesir lo louvraz ou lanmen.

⁶ Mon lev mon lanmen ver ou. Mon soupir apre ou parey en later san delo.

⁷ SENYER! Reponn mwan vit. Mon lespri i trouble. Pa detourn ou vizaz avek mwan, sinon mon pou parey sa bann ki desann dan lemonn lanmor.

⁸ Depi granmaten, anons mwan ou fidelite akoz mon fer ou konfyans. Fer mwan konnen ki semen mon devre swiv, akoz mon tourn ver ou.

⁹ SENYER! Sov mwan kont mon bann lennmi. Mon'n sov kot ou, pour mwan ganny en labri.

¹⁰ Ansenny mwan pour fer ou lavolonte, akoz ou mon Bondye. Par ou bon lespri, kondwir mwan lo en semen kot napa danze.

¹¹ SENYER! Pour loner ou non, prezerv mon lavi. Dan ou lazistis tir mwan dan maler.

¹² Dan ou fidelite, ekstermin mon bann lennmi, detri mon bann ladverser akoz mon ou serviter.