Psonm 142 - Labib An Kreol Seselwa

Lapriyer pour Demann Sekour

En lapriyer ler i ti dan kavern.

¹ Avek tou mon lafors, mon kriy ver SENYER. Avek tou mon lafors, mon sipliy SENYER.

² Mon devers mon problenm devan li; mon rakont li mon maler.

³ Kan mon nepli annan kouraz, ou ki konn semen ki mon'n pran. Dan semen kot mon pase, zot in plas en latrap pour mwan.

⁴ Get lo mon kote drwat, ou ava war: Personn pa rekonnet mwan. Mon napa en labri; personn pa pran ka pour mwan.

⁵ SENYER! Mon kriy ver ou. Mon dir: Ou menm mon labri, ou menm mon posesyon lo sa later.

⁶ Ekout mon lapel akoz mon'n tonm byen ba. Delivre mwan kont mon bann persekiter, akoz zot pli for ki mwan.

⁷ Delivre mwan dan prizon pour mwan kapab loue ou non. Dimoun zis ava antour mwan akoz ou fer mwan bokou dibyen.