Psonm 140 - Labib An Kreol Seselwa

Lapriyer pour Demann Proteksyon

Psonm David.

¹ SENYER! Delivre mwan kont bann malfeter. Protez mwan kont dimoun vyolan,

² ki prepar bann move kou dan zot lespri. Tou le zour zot pe provok lager.

³ Zot lalang i pwent parey lalang en serpan; anba zot lalev, zot annan venen serpan.

⁴ SENYER! Anpes mwan tonm dan lanmen bann malfeter; protez mwan kont dimoun vyolan ki'n fer plan pour fer mwan tonbe.

⁵ Bann dimoun arogan in plas en latrap pour mwan. Zot in anmar en lakord, en lasenn obor semen. Zot in met en pyez pour mwan.

⁶ Mon dir avek SENYER: Ou menm mon Bondye. Ekout mon lavwa, mon pe sipliy ou, SENYER!

⁷ SENYER Bondye! Ou menm lafors mon delivrans. Ou'n protez mon latet dan konba.

⁸ SENYER! Pa pran ka avek plan bann malfeter. Pa les zot reisi dan zot proze.

⁹ Bann ki pe antour mwan pe lev latet. Zot in swet mon maler. Fer ki sa maler i retonm lo zot.

¹⁰ Fer bann labrez sarbon tonm lo zot e fer zot ganny zete dan dife kot zot pa pou kapab sorti.

¹¹ Pa les dimoun ki fer kalonmni, viv dan pei. Ki maler i pourswiv sa enn ki servi vyolans.

¹² Mon konnen ki SENYER pa oubliy bann malere e ki i rann zizman an faver bann pov.

¹³ Dimoun ki zis pou selebre ou non; dimoun ki drwat pou viv dan ou prezans.