Psonm 14 - Labib An Kreol Seselwa

Mesanste Zonm

Psonm David, dan repertwar sef lakoral.

¹ Bann fou i dir dan zot leker: Napa Bondye. Zot koronpi. Zot fer bann aksyon degoutan. Personn pa fer sa ki byen.

² Lao dan lesyel, SENYER i get zabitan later pour li war si i annan dimoun ki konpran e ki vin rod Bondye.

³ Zot tou, zot in egare; zot tou, zot in koronpi. Personn pa fer sa ki byen, pa menm en sel.

⁴ Eski sa bann malfeter i inyoran? Zot pe devor mon pep; zot pe manz son dipen. Zot pa ni priy SENYER.

⁵ Alor, zot pou tranble avek lafreyer, akoz Bondye i lo kote bann ki zis.

⁶ Zot mepriz lespwar en malere. Me SENYER i son protekter.

⁷ Lekel ki pou sorti Zerizalenm pour delivre Izrael? Kan SENYER ava anmenn sanzman dan sityasyon son pep, bann desandan Zakob pou dan lazwa; pep Izrael pou rezoui.