Psonm 132 - Labib An Kreol Seselwa

Louanz an Loner Tanp

Kantik pelrinaz.

¹ SENYER! Pa oubliy David. Mazin tou bann soufrans ki i'n sibir.

² I ti fer sa serman devan SENYER e sa promes avek Bondye Pwisan Zakob:

³ Mon pa pou antre dan mon lakaz ni al dormi lo mon lili.

⁴ Mon pa pou ferm mon lizye ni les mwan ganny sonmey,

⁵ tan ki mon pa trouv en landrwa pour SENYER, en landrwa reste pour Bondye Pwisan Zakob.

⁶ Nou'n antann koz lo li dan Efrata; nou'n war li dan bann laplenn Yaar:

⁷ Annou al kot i reste; annou al prostern devan son tronn.

⁸ Leve SENYER! Al dan ou landrwa repo, ou, avek Kof lalyans kot ou pwisans i ete.

⁹ Ou bann pret ava ganny anvlope dan lazistis e ou bann fidel ava kriye ranpli avek lazwa.

¹⁰ Pour lanmour David ou serviter, pa met de kote, sa enn ki ou'n konsakre.

¹¹ SENYER in fer sa serman avek David; en serman ki i pa pou sanze: Mon pou met enn ou bann zanfan lo ou tronn.

¹² Si ou bann garson i gard mon lalyans e mon bann lord ki mon pou ansenny zot, alor, zot bann garson osi pou asiz lo ou tronn pour touzour.

¹³ Annefe, SENYER in swazir Zerizalenm koman sa landrwa kot i anvi reste.

¹⁴ I ti deklare: Mon pou reste la pour touzour; lanmenm la kot mon pou reste, akoz mon'n deside.

¹⁵ Mon pou beni son bann rekolt; mon pou donn manze son bann pov ziska ki zot ava rasazye.

¹⁶ Mon pou anvlop son bann pret dan mon delivrans e son bann fidel pou sant zot lazwa.

¹⁷ La, mon pou fer sorti en gran lerwa dan fanmir David. Mon pou prepar en lalanp pour sa enn ki mon'n konsakre.

¹⁸ Mon pou anvlop son bann lennmi dan laont. Me li, son kouronn pou klate lo son latet.