Psonm 130 - Labib An Kreol Seselwa

Lapriyer pour Demann Sekour

Kantik pelrinaz.

¹ Depi dan fon mon maler, mon apel ou, SENYER.

² SENYER! Ekout mon lapel Port atansyon kan mon sipliy ou.

³ SENYER! Si ou tenir kont tou nou bann pese! Lekel ki pou sibziste?

⁴ Me pardon i kot ou, e nou ava annan respe pour ou.

⁵ Mon met mon lespwar dan SENYER; mon pe espere avek tou mon leker. Mon annan konfyans dan son parol.

⁶ Mon esper SENYER avek tou mon leker plis ki en gardyen i espere pour lizour fer. Wi! Plis ki en gardyen i espere pour lizour fer.

⁷ Pep Izrael! Met ou lespwar dan SENYER, akoz SENYER i fidel. I annan mil fason pour li delivre ou.

⁸ Li menm ki pou delivre Izrael dan tou son bann pese.