Psonm 126 - Labib An Kreol Seselwa

Lapriyer pour Delivrans

Kantik pelrinaz.

¹ Zour SENYER ti retabli Zerizalenm, nou ti krwar ki nou ti pe reve.

² Alor, nou pa ti arete riye, nou ti kriy avek lazwa. Alor, parmi lezot nasyon zot ti dir: SENYER in fer bann gran mervey pour zot!

³ Annefe, SENYER in fer bokou keksoz pour nou e nou ti dan lazwa.

⁴ SENYER! Retabli nou sityasyon parey ler ou donn delo dan larivyer Negev.

⁵ Sa enn ki senm avek larm pou rekolte avek lazwa.

⁶ I ale avek larm dan lizye, son sak lagrenn lo son ledo. I retourn dan lazwa avek prodwi son rekolt.