Psonm 124 - Labib An Kreol Seselwa

Bondye I Protekter son Pep

Psonm David. Kantik pelrinaz.

¹ Si SENYER pa ti dan nou kote, Izrael! Repete!

² Si SENYER pa ti dan nou kote, kan nou bann lennmi ti atak nou,

³ alor, dan zot gran lakoler kont nou, zot ti ava'n anval nou vivan.

⁴ Kouran ti ava'n balye nou; en linondasyon ti ava'n kouver nou.

⁵ Bann gro larivyer ti ava'n noy nou.

⁶ Nou remersye SENYER ki pa'n les nou tonm anba zot ledan.

⁷ Nou'n kapab sape parey en zwazo ki'n sape dan lasenn bann saser. Zot lasenn in kase e nou'n kapab sove.

⁸ Nou sekour i dan non SENYER ki'n fer lesyel ek later.