Psonm 120 - Labib An Kreol Seselwa

Lapriyer pour Demann Sekour

Kantik pour pelrinaz.

¹ Dan mon detres, mon ti kriy ver SENYER e i ti reponn mwan.

² SENYER! Delivre mwan kont labous bann manter, kont bann lalang tronper.

³ Ki i pou donn ou, ki en lalang tronper pour donn ou an plis?

⁴ I ava pini ou avek bann dart lager, fite anba labrez bon dibwa.

⁵ Maler pour mwan, en etranze parmi bann barbar e ki reste parmi bann sovaz!

⁶ Mon'n reste tro lontan parmi bann dimoun ki pa kontan lape.

⁷ Mwan, mon pour lape. Me zot, zot swazir lager.