Psonm 12 - Labib An Kreol Seselwa

Lapriyer pour Demann Led

Psonm David, sorti dan repertwar sef lakoral, avek bann lenstriman wit lakord.

¹ SENYER! Mon kriy osekour. Tou dimoun fidel in disparet. Nepli annan personn ki ou kapab fer konfyans.

² Dimoun i koz manti avek kanmarad. Zot flat avek zot labous, me zot leker pa senser.

³ SENYER! Elimin bann flater ek sa bann gran labous ki dir:

⁴ Nou konn koze, nou pli for; personn pa fer nou per.

⁵ SENYER i deklare: Akoz bann pov in ganny kraze, akoz bann ki dan bezwen pe plennyen, mon pou pran aksyon. Mon pou protez zot parey zot demande.

⁶ Parol SENYER i pir. I parey larzan ki'n ganny pirifye set fwa.

⁷ SENYER! Gard nou. Protez nou kont sa bann dimoun pour touzour.

⁸ Zot pe rodaye partou e koripsyon pe repann partou dan lemonn.