Psonm 113 - Labib An Kreol Seselwa

Remersiman pour Labonte Bondye

¹ Loue SENYER! Serviter SENYER loue! Loue non SENYER!

² Loue non SENYER aprezan e pour touzour!

³ Loue non SENYER depi soley leve ziska soley kouse.

⁴ SENYER i renny lo tou bann nasyon; son grander i depas lesyel.

⁵ Lekel ki parey SENYER nou Bondye? Son tronn i lao.

⁶ Depi lao, i bese pour li war lesyel ek later.

⁷ I relev sa enn ki pov dan lapousyer; i tir bann malere dan salte.

⁸ I fer zot asiz avek bann sef, bann sef ki gouvern son pep.

⁹ I donn en lakaz sa fanm steril. I parey en manman ki partaz lazwa son bann zanfan. Loue SENYER!