Psonm 110 - Labib An Kreol Seselwa

Senyer ek Son Lerwa ki i'n Swazir

Psonm David.

¹ SENYER ti dir avek mon senyer lerwa: Asiz lo mon kote drwat, ziska ki mon met ou bann lennmi anba ou lipye.

² Depi Siyon, SENYER pou agrandi ou dominasyon. I pou fer ou domin lo ou bann lennmi.

³ Ou pep i volonter zour ou al lager. Bann zennzan pou vin ver ou lo montanny sen.

⁴ SENYER in fer sa serman e i pa pou sanze: Ou pret pour touzour, dapre lord Melkisedek.

⁵ SENYER i lo ou kote drwat. Zour son lakoler i leve, i pou kraz bann lerwa.

⁶ I pou ziz bann nasyon. Kadav i partou. Partou lo later, bann sef i ganny touye.

⁷ Letan i pe ale, i pou bwar delo dan larivyer. Pour sa rezon, i lev son latet.