Psonm 108 - Labib An Kreol Seselwa

Lapriyer pour Demann Led Kont Lennmi

En psonm David. En sanson.

¹ Mon Bondye! Mon leker i ranpli avek konfyans. Mon vreman annan konfyans. Mon pou sante, mon pou zwe lanmizik pour ou.

² Bann lenstriman lanmizik! Reveye! Mon pou fer lizour aparet.

³ SENYER! Mon pou loue ou parmi bann pep. Mon pou sant ou louanz parmi bann nasyon.

⁴ Ou fidelite i pli gran ki lesyel; ou lanmour i ariv ziska dan nyaz.

⁵ Mon Bondye! Montre ou grander ki depas lesyel! Kouver later antye avek ou laglwar!

⁶ Par ou pwisans, donn nou laviktwar; reponn nou e delivre bann ki ou kontan.

⁷ Depi son sanktyer, Bondye in promet: Avek lazwa, mon pou diviz lavil Sikenm. Mon pou partaz vale Soukot.

⁸ Galaad i pour mwan; Manase osi; Efraim i mon kasket. Zida i mon baton komann.

⁹ Moab i mon kivet, pour mwan bennyen; mon zet mon sandal lo Edonm; Mon proklanm laviktwar lo pei Filisten.

¹⁰ Lekel ki pou anmenn mwan dan lavil fortifye? Lekel ki pou kondwir mwan ziska Edonm?

¹¹ Mon Bondye! Pa ou'n rezet nou! Ou nepli sorti pour konbat avek nou larme!

¹² Sekour nou kont lennmi; sekour imen napa valer.

¹³ Avek Bondye nou pou ganny gran laviktwar. Li menm ki pou kraz nou bann lennmi.