Proverb 31 - Labib An Kreol Seselwa

Konsey pour En Lerwa

¹ Parol lerwa Lemouel. Konsey ki son manman ti servi pour enstri li.

² Mon garson! Ki mon pou dir ou? Ki mon pou dir ou, ou ki'n sorti dan mon vant. Ki mon pour dir ou garson ki mon'n dezire?

³ Pa donn ou lafors bann fanm; pa les ou ganny anbete par bann fanm ki koz maler bann lerwa.

⁴ Lemouel! Lerwa pa devre bwar, diven pa bon pour bann lerwa, ni bann sef kontan bwar lalkol.

⁵ Ler zot in bwar, zot oubliye sa ki lalwa i dir e zot trai drwa bann pov.

⁶ Donn labwason for sa enn ki pou mor, diven sa enn ki tris,

⁷ pour ki i oubliy son lanmizer, pour ki i oubliy son lapenn!

⁸ Koz pour sa bann ki pa kapab koze; defann drwa tou sa bann ki'n ganny abandonnen.

⁹ Koze! Ziz avek lazistis. Defann lakoz bann pov ek bann dezerite.

Portre En Fanm Valer

¹⁰ Lekel ki'n dekouver en fanm valer? I vo plis ki tou bann bizou.

¹¹ Leker son mari i fer li konfyans, e i pa pou mank nanryen.

¹² Tou le zour son lavi, i fer zis dibyen, non pa dimal.

¹³ I rod lalenn ek latwal linenn; i pran plezir travay avek son lanmen.

¹⁴ I parey bann bato marsan, i fer vin son dipen depi pei lwen.

¹⁵ I leve avan lizour i fer, i prepar dekwa manze pour son fanmir, i distribye travay ki annan pour fer avek son bann servant.

¹⁶ Apre refleksyon ki i aste en propriyete; avek son prop lanmen i plant bann pye rezen.

¹⁷ I ser son leren avek lafors; i rann son lebra pli for.

¹⁸ I satisfe avek son komers. I pa tenny son lalanp pandan lannwit.

¹⁹ Avek son lanmen, i fil difil; son lanmen i gid fizo.

²⁰ I touzour pare pour ed sa enn ki pov, i touzour la pour bann dezerite.

²¹ I pa per lannez pour son fanmir; tou dimoun kot li i annan dekwa pour abiye.

²² I fabrik bann kouvertir; i annan bann lenz fer avek len fen, kouler rouz.

²³ Ler son mari i asiz avek bann ansyen dan pei, dimoun i rekonnet li devan laport lavil.

²⁴ I fabrik bann lenz linenn ki i vann; i livre bann sentir avek bann marsan.

²⁵ I respir lafors ek dinyite, i annan konfyans dan lavenir.

²⁶ I koz avek lasazes; son labous i ansenny lafidelite.

²⁷ I sirvey tou sa ki pas dan son lakaz, i pa manz dipen lapares.

²⁸ Son bann zanfan i leve e deklar li ere; son mari i leve e felisit li.

²⁹ Bokou fiy in montre sa ki zot kapab fer; me ou, ou depas zot tou.

³⁰ Elegans i tronper, labote i anbete. En fanm ki annan respe pour SENYER, i devre ganny loue.

³¹ Rekonpans li pour travay fer avek son lanmen; tou son bann travay i loue li ziska laport lavil.