Proverb 21 - Labib An Kreol Seselwa

¹ Leker lerwa i en pti larivyer dan lanmen SENYER. I diriz li partou kot i oule.

² Dimoun i krwar ki tou sa ki i fer i byen; me SENYER ki sond leker.

³ SENYER i prefer ladrwatir ek lazistis, plito ki bann sakrifis.

⁴ En regar fyer e en leker ranpli avek larogans, i montre ki ou en malfeter: I en pese.

⁵ Plan sa enn ki aktif i fer li vin ris; me sa enn ki azir an vites pour konn lapovrete.

⁶ Sa enn ki vin ris par mansonz, son bann aki napa valer

⁷ Lavyolans bann malfeter pour anmenn zot dan zot perdisyon, akoz zot refiz fer sa ki byen.

⁸ Semen sa enn ki malonnet i tord; me mannyer fer sa enn ki inosan i drwat.

⁹ Vomye viv dan kwen en lakaz, ki viv dan lakaz en fanm ki kontan dispit.

¹⁰ En malfeter i mazin zis fer sa ki mal; i napa pitye menm pour son zanmi.

¹¹ Pinisyon en ensolan i fer sa enn ki bet vin saz; ler en saz i ganny enstri, i ganny konnesans.

¹² Sa enn ki zis i obzerv lakaz en malfeter; i zet li dan larin.

¹³ Sa enn ki bous son zorey ler en pov i kriye, pa pou ganny okenn larepons zour i ava kriye.

¹⁴ En kado ki'n ganny donn an sekre, i kalme lakoler; en prezan ki'n dan pos i tenny lakoler.

¹⁵ Sa enn ki zis i dan lazwa ler i azir dapre lazistis; me i fer per bann malfeter.

¹⁶ Sa enn ki abandonn semen konnesans, pou fini dan lasanble dimoun mor.

¹⁷ Sa enn ki kontan fer lafet pou reste touzour pov. Sa enn ki kontan diven ek delwil pa pou zanmen vin ris.

¹⁸ Malfeter i en garanti pour sa enn ki zis; Tret i en garanti pour dimoun ki drwat.

¹⁹ Vomye viv dan kwen en dezer, ki viv avek en fanm nervez ki rod dispit.

²⁰ I annan en trezor presye ek delwil an rezerv dan lakaz en saz; me en dimoun bet i goberz tou.

²¹ Sa enn ki rod lazistis ek lafidelite, pour dekouver lavi, lazistis ek loner.

²² Sa enn ki saz, i atak en lavil fortifye; i kraz fortifikasyon kot zot ti'n met zot konfyans.

²³ Sa enn ki vey lo parol ki i dir, i protez li kont maler.

²⁴ Sa enn ki fyer e vantar, i ensolan; i azir avek bokou larogans.

²⁵ Dezir en parese i touy li, akoz son lanmen i refize travay.

²⁶ I touzour anvye lezot; me sa enn ki zis i donnen san gard nanryen pour li.

²⁷ Sakrifis bann malfeter i degoutan; anplis, zot ofer li avek move lentansyon.

²⁸ En fo temwen pou disparet; me sa enn ki ekoute, ava kapab donn en bon temwannyaz.

²⁹ Bann malfeter i pran en figir serye; Me sa enn ki drwat i reflesi lo son mannyer fer.

³⁰ Napa okenn lasazes imen, okenn rezonnman, okenn konsey imen, ki kapab tenir devan SENYER.

³¹ Seval i ganny ekipe pour zour konba; me SENYER ki donn laviktwar.