Proverb 2 - Labib An Kreol Seselwa

Valer Lasazes

¹ Mon garson! Si ou aksepte mon bann parol; si ou gard byen mon bann komannman;

² si ou ekout byen lansennyman lasazes e ouver ou leker pour konpran li;

³ si ou vreman demann disernman; si ou demann larezon;

⁴ si ou rod lasazes parey ou rod larzan; si ou rod li parey ou rod en trezor,

⁵ alor, ou ava konpran ki savedir respe pour Bondye e ou ava reisi konn Bondye.

⁶ Annefe, SENYER ki donn lasazes; konnesans ek larezon i sorti kot li.

⁷ I gard an rezerv bann resours pour dimoun ki drwat; i en boukliye pour bann ki viv onnetman.

⁸ I protez sa enn ki mars dapre ladrwatir, i vey semen sa enn ki fidel.

⁹ Alor, ou ava konpran kisisa ladrwatir, lazistis ek lonnekte, tou bann semen ki kondwir ver boner.

Lasazes I En Proteksyon Kont Lemal

¹⁰ Kan lasazes ava penetre ou leker e konnesans ava donn lazwa dan ou et antye.

¹¹ Refleksyon ava protez ou, larezon ava vey lo ou.

¹² I ava anpes ou tonm dan lemal e prezerv ou kont bann manter,

¹³ ek bann ki abandonn semen ladrwatir, pour pran semen fernwanr.

¹⁴ Sa bann dimoun, zot pran plezir dan lemal e zot lazwa i dan sa dimal.

¹⁵ Zot semen i tord e zot bann aksyon pa drwat.

¹⁶ Konmsa, ou ava ganny delivre kont en fanm imoral; kont en fanm etranze avek parol anmyelan.

¹⁷ I'n abandonn son premye lanmoure e oubliy lalyans son Bondye.

¹⁸ Son mannyer viv i antrenn li ver lanmor; son mannyer fer i kondwir li dan fernwanr.

¹⁹ Tou dimoun ki al kot li pa zanmen retournen, ni retrouv semen lavi.

²⁰ Alor, swiv semen dimoun ki bon; imit dimoun ki zis.

²¹ Annefe, dimoun zis ki pou reste dan sa pei; bann inosan ki ava kontinyen reste.

²² Me bann malfeter pou ganny sase dan sa pei, bann tret ava ganny derasinen lo sa later.