Oze 14 - Labib An Kreol Seselwa

Oze I Pled pour Izrael

¹ Izrael! Retourn ver SENYER ou Bondye. Ou fot in fer ou tonbe.

² Anmenn parol avek ou e retourn kot SENYER. Dir li: Pardonn tou nou bann krim; aksepte sa ki bon; dan plas toro, nou ofer ou bann fri nou labous.

³ Asiri pa kapab sov nou, nou pa pou mont seval; nou pa pou koz ankor; nou pa pou dir ankor avek travay ki nou lanmen in fer: Ou nou Bondye. Ou ki pran pitye pour bann orfelen.

⁴ Mon pou geri zot lenfidelite. Mon pou kontan li avek tou mon leker, akoz mon nepli ankoler kont li.

⁵ Mon pou vin en laroze pour Izrael; i pou fleri parey en lis; i pou pran rasin parey pye dibwa dan lafore Liban.

⁶ Son bann brans pou tale, son labote pou parey pye zoliv, son loder pou santi bon parey montanny Liban.

⁷ Zot pou vin reste ankor anba mon lonbraz; zot ava fer dible repouse; zot pou fleri parey en pye rezen e donn Liban en loder diven.

⁸ Efraim! Ki i annan ant mwan ek ou bann zidol? Se mwan ki reponn e pran swen avek ou. Parey en pye dibwa byen ver, mon ava kouver ou anba mon feyaz. Mwan ki fer ou donn fri.

⁹ Bann ki annan lasazes ava konpran sa. Bann ki annan disernman i konnen. Semen SENYER i drwat. Dimoun ki drwat pou swiv, me bann rebel pou tonbe.