Oze 12 - Labib An Kreol Seselwa

¹ Efraim i nouri lo divan, i tay deryer divan Les tou lazournen; i miltipliy mansonz ek vyolans. In fer en lalyans avek Asiri, e i fourni delwil doliv Lezip.

² SENYER in fer en lakizasyon kont Zida. I pou pini Zakob dapre son move kondwit, e fer li peye pour son bann aksyon.

³ Dan vant son manman, i ti atrap son frer par son talon, e kan in grand, i'n lager avek Bondye.

⁴ I ti lager avek lanz e i ti ganny laviktwar; i ti plere e sipliye pour ganny benediksyon. I ti'n rankontre li letan i ti Betel. Se la ki i ti koz avek nou.

⁵ SENYER i Bondye liniver; son non i SENYER. Konmsa ki i devre ganny envoke.

⁶ Me ou, ou devre retourn kot ou Bondye, pratik lanmour e annan respe pour lazistis; touzour met ou lesperans dan ou Bondye.

Ankor Parol Zizman

⁷ Parey bann Kananeen, Efraim i kontan servi fo balans, i kontan fer frod.

⁸ Efraim i dir: Mon ris, mon'n fer en fortin. Me mon pa'n fer nanryen mal; mon pa'n fer okenn fot ki en pese.

⁹ Mwan, mon SENYER ou Bondye, depi ki ou ti ankor Lezip. Mon pou fer ou viv dan latant ankor, parey lontan, dan nou bann rankont.

¹⁰ Mon ti koz avek bann profet; mwan ki miltipliy zot bann vizyon, e atraver bann profet, mon pou anmenn destriksyon.

¹¹ Galaad in komet pese e i pou disparet. Dan Gilgal, zot ofer sakrifis toro, me son bann lotel i zis en ta ros dan transe plantasyon.

¹² Zakob ti sove pour al an Mezopotami. I ti antre dan servis en lot zonm pour ganny en fanm. Pour pri en fanm, i ti vin en gardyen mouton.

¹³ Par lentermedyer en profet, SENYER ti fer Izrael sorti Lezip. Par en profet, i ti gard Izrael, son pep.

¹⁴ Efraim ti provok son lakoler; SENYER pou fer li pey konsekans son bann krim.