Oze 11 - Labib An Kreol Seselwa

Lanmour Bondye pour bann Rebel

¹ Kan Izrael ti ankor zenn, mon ti kontan li, mon'n apel mon garson pour sorti Lezip.

² Plis mon apel zot, plis zot elwanny zot avek mwan; zot kontinyen ofer sakrifis devan Baal, e ofer lansan devan bann zidol.

³ Me mwan ki ti montre Efraim marse; mon ti pran zot dan mon lebra; me zot pa ti konnen ki mon pran swen pour zot.

⁴ Mon ti gid zot avek lafeksyon, ek lanmour; mon ti pran zot koman mon zanfan e plas zot kont mon lazou. Mon ti bese e fer zot manze.

⁵ Zot pa pou retourn Lezip, me en Asiriyen ki pou vin zot lerwa, akoz zot in refize retourn kot mwan.

⁶ Lepe lager pou balye zot bann lavil. I pou detri tou son bann defans, i pou devor tou, akoz zot move proze.

⁷ Mon pep i antete pour elwanny zot avek mwan. Zot ganny apele lao, me personn pa leve.

⁸ Ki mannyer mon pou kapab abandonn Efraim, e debarase avek ou, Izrael? Ki mannyer mon pou kapab tret ou parey Adma, e tret ou parey avek Seboim? Sa lide i boulvers mon leker, mon konpasyon i tro for.

⁹ Mon pa pou les monte mon gran lakoler; mon pa pou detri Efraim ankor; akoz mon pa en zonm, mwan Bondye, sa Enn ki sen i parmi zot, mon pa pe vin kot zot avek lakoler.

¹⁰ Zot pou swiv SENYER ki pou kriye parey en lyon. Kan i kriye, son bann zanfan pou taye sorti dan Was an tranblan.

¹¹ Zot pou arive an tranblan parey zwazo sorti Lezip, parey en group tourtrel sorti Asiri. Mon pou fer zot retourn se zot. SENYER ki'n deklare.

¹² Efraim in antour mwan avek mansonz. Izrael in anvlop mwan dan son bann tronpri; me Zida i reste fidel e i mars avek Bondye sen.