Nonm 8 - Labib An Kreol Seselwa

Portlanp dan Sanktyer

¹ SENYER ti koz avek Moiz:

² Dir avek Aaron: Ler ou alim bann lalanp, sa lalimyer i bezwen ekler devan portlanp.

³ Aaron ti fer egzakteman sa: I ti poz bann lalanp pour ki son lalimyer i ekler devan portlanp, parey SENYER ti'n dir Moiz fer.

⁴ La ki mannyer portlanp ti'n ganny fer: I ti'n ganny forze avek en sel morso lor depi anba ziska anler. Sa portlanp ti dapre model ki SENYER ti'n montre Moiz.

Konsekrasyon bann Levit

⁵ SENYER ti dir Moiz:

⁶ Pran bann levit parmi kominote Izrael e pirifye zot.

⁷ La koman ou ava fer rityel pirifikasyon: Fer aspersyon delo pirifikasyon lo zot; les zot raz zot lekor, lav zot lenz e pirifye zot.

⁸ Answit, zot ava pran en toro avek lofrann vezetal petri dan delwil. Pran en dezyenm toro pour sakrifis pese.

⁹ Fer bann levit avans devan Latant Rankont SENYER e rasanble kominote Izrael antye.

¹⁰ Ou ava fer bann levit vin devan SENYER e pep Izrael ava enpoz lanmen lo zot.

¹¹ Aaron ava prezant bann levit devan SENYER parey i prezant lofrann bann Izraelit. Zot ava ganny met apar pour fer servis dan tanp SENYER.

¹² Bann levit ava poz zot lanmen lo latet bann toro. Apre, zot ava ofer enn sa bann toro pour sakrifis pese e en lot pour sakrifis konplet, pour zot ganny pardon zot pese.

¹³ Plas sa bann levit debout devan Aaron e devan son bann garson. Prezant zot koman en lofrann pour SENYER.

¹⁴ Met bann levit apar; zot ava pour mwan.

¹⁵ Apre, zot ava kapab vin servi dan Latant Rankont SENYER. Ou ava pirifye zot e prezant zot koman en lofrann.

¹⁶ Akoz zot in ganny konsakre antyerman pour mwan parmi pep Izrael, mon'n pran zot dan plas tou bann lene garson dan Izrael.

¹⁷ Annefe, tou bann lene dan Izrael i pour mwan, swa parmi zonm, swa parmi zannimo. Zour ki mon ti frap tou bann lene dan pei Lezip, mon ti konsakre zot pour mwan.

¹⁸ Mon'n pran bann levit dan plas tou bann lene parmi pep Izrael.

¹⁹ Mon'n donn Aaron ek son bann garson, tou sa bann levit pour zot fer servis dan Latant Rankont SENYER e pour fer rityel pardon pese lo zot. Konmsa, pep Izrael pa ava ganny frape par en fleo si i vin obor Latant Rankont SENYER.

²⁰ Moiz, Aaron ek kominote Izrael ti fer tousala an faver bann levit. Pep Izrael ti fer egzakteman sa ki SENYER ti'n dir Moiz lo size bann levit.

²¹ Bann levit ti fer zot pirifikasyon e lav zot lenz. Aaron ti prezant zot parey en lofrann devan SENYER; i ti fer lo zot bann rityel pour pirifye zot.

²² Apre sa, bann levit ti al pran sakenn son fonksyon dan Latant Rankont SENYER, anba sipervizyon Aaron ek son bann garson. Zot ti fer avek bann Levit tou sa ki SENYER ti'n ordonnen par lentermedyer Moiz lo zot size.

²³ SENYER ti dir Moiz:

²⁴ La regleman ki konsern travay bann levit: Apartir laz 25 an, en levit i bezwen prepar li pour akonpli son servis dan Latant Rankont SENYER.

²⁵ Apre laz 50 an, i ava retir li dan servis e i pa pou bezwen travay ankor.

²⁶ I kapab asiste son bann frer dan bann fonksyon dan Latant Rankont SENYER, me i pa bezwen travay. Sa i regleman ki konsern travay bann levit.