Nehemi 6 - Labib An Kreol Seselwa

Nouvo Lobstak

¹ Kan Sanbalat, Tobiya, Gesenm, sa Arab, ek tou lezot nou bann lennmi ti aprann ki mon ti'n fini rekonstri miray e ki ti nepli annan okenn trou dan miray, dan sa moman mon pa ti'n ankor fini fikse bann batan laport.

² Sanbalat ek Gesenm ti anvoy bann mesaze kot mwan, pour dir: Annou rankontre kanmarad dan enn bann vilaz, dan laplenn Ono. Zot ti annan lentansyon fer mwan dimal.

³ Alor, mon ti anvoy zot bann mesaze pour dir zot: Mon annan bokou travay pour fer e mon napa letan pour desann. Akfer travay ava bezwen ganny enteronpe, letan mon desann pour vin kot zot?

⁴ Zot ti anvoy mwan, menm mesaz pandan kat fwa; mon ti rann zot menm repons.

⁵ Sanbalat ti anvoy mwan sa menm mesaz pour en senkyenm fwa, par son zenn serviter, dan en let ouver ki i ti pe tenir dan lanmen.

⁶ La sa ki ti'n ekri: I annan en rimer parmi bann nasyon, e Gesenm i konfirmen ki ou, avek bann Zwif, zot annan lentansyon revolte. Pour sa rezon ki ou pe rekonstri sa miray; e dapre sa rapor, oule vin zot lerwa.

⁷ Ou'n menm swazir bann profet pour fer proklanmasyon dan Zerizalenm lo ou size, pour dir: I annan en lerwa dan Zida. Sa bann parol pou ganny raporte kot lerwa. Alor, mon konsey ou, annou zwenn ansanm pour diskite.

⁸ Mon ti anvoy dir li: Okenn sa bann rimer pa egziste; se ou ki pe envante.

⁹ Zot tou, zot ti oule fer nou per; zot ti dir antre zot: Zot ava dekouraze e travay pa pou kontinyen. Alor! Bondye! Donn mwan kouraz.

¹⁰ Mon ti al kot Semaya, garson Delaya, garson Mehetabeel, ki ti'n anferm li kot li. I ti dir, “Annou al ansanm dan tanp SENYER, e nou ava ferm laport tanp, akoz zot pou vin touy ou pandan lannwit.”

¹¹ Mon ti reponn, “Eski en zonm koman mwan i devre sove? Eski en zonm koman mwan devre antre dan tanp pour li sov son lavi? Mon pa pou ale.”

¹² Alor, mon ti konpran ki pa Bondye ki ti'n anvoy li; me i ti'n pronons sa parol profetik kont mwan, akoz Tobiya ek Sanbalat ti'n pey li.

¹³ I ti'n ganny peye osi pour fer mwan per e swiv son bann konsey pour ki mon fer pese. Konmsa, zot ti ava kapab sali mon repitasyon pour mwan ganny dezonore.

¹⁴ Mon ti priye: Mon Bondye! Rapel byen Tobiya, Sanbalat, ek tou sa ki zot in fer, ansanm avek profetes Noadya ek tou leres bann profet ki ti oule fer mwan per.

Travay I Fini

¹⁵ Travay lo miray ti terminen le 25 dan mwan Eloul; ti'n pran 52 zour.

¹⁶ Kan tou nou bann lennmi ti antann sa, e ki bann nasyon otour nou ti war sa miray, zot ti kanmi. Zot ti rekonnet ki sa travay ti'n ganny realize gras a led nou Bondye.

¹⁷ Dan sa letan, ti annan bokou lesanz korespondans ant bann sef dan Zida ek Tobiya.

¹⁸ Annefe, bokou zabitan dan Zida ti'n angaz zot par serman avek Tobiya, akoz i ti'n marye avek fiy en Zwif, Sekanya, garson Ara, e son prop garson Yohanann ti'n marye avek fiy Mesoulanm, garson Berekya.

¹⁹ Zot ti osi koz an byen devan mwan e raport parol ki mon ti'n dir lo li. Tobiya ti anvoy bann let pour fer mwan per.