Nahoum 3 - Labib An Kreol Seselwa

¹ Maler pour sa lavil ki kontan fer disan koule; sa ki ranpli avek mansonz ek vyolans, e ki pa arete vole!

² Ekout koudfwet, tapaz larou, seval ki pe galope, tapaz kales lager!

³ Bann kavalye i atake, avek lepe ek lans ki zot fer klate. I annan en kantite blese, en ta lekor mor. Kadav i partou, bann gerye i per lekilib lo zot!

Niniv I Ganny Kouver avek Laont

⁴ Niniv! Ou koman en prostitye par ou lavi debos? Par ou labote ou ti andoy dimoun e vann bann nasyon. Par ou prostitisyon ou'n anbet bann pep.

⁵ Alor, la sa ki SENYER liniver i deklare: Mon kont ou, mon pou lev ou rob ziska lo ou figir. Mon pou montre bann nasyon ou touni e bann rwayonm ava war ou laont.

⁶ Mon pou kouver ou avek salte; mon pou mepriz ou e fer ou en spektak.

⁷ Tou sa ki pou war ou pou taye. Zot pou dir: Lavil Niniv in ganny detri; lekel ki pou pler lo li? Kote mon pou rod rekonfor pour ou?

⁸ Niniv! Eski ou dan en meyer pozisyon ki lavil Teb, lavil antoure avek delo ki'n ganny konstri dan milye bann lebra larivyer Nil. Lanmer ti son defans e delo i en miray otour li.

⁹ Letyopi ek Lezip ti son lafors, ki ti san limit. Pep Pout ek pep Libyen ti son bann alye.

¹⁰ Malgre sa, zabitan Teb ti ganny anvoye annegzil. Son bann zanfan ti ganny kraze an pti morso dan tou bann kwen semen. Zot ti tir osor pour bann dimoun enportan; bann sef ti ganny ansennen.

¹¹ Ou osi, ou pou sou e ou pou drive. Ou pou rod en landrwa kasyet kont lennmi.

Niniv pa Kapab Reziste

¹² Tou ou bann fortifikasyon i parey fig mir ki bon pou manze. De ki ou sekwe son pye, bann fri pou tonm dan labous sa enn ki oule manz zot.

¹³ Gete, ou bann gerye, parey bann fanm, nepli kapab lager. Bann laport ou pei i gran ouver pour ou bann lennmi; dife in detri bann fermtir.

¹⁴ Ranpli delo pour prepar zour batay; repar ou bann fortres; brouy later pour fer blok; pran moul pour fer blok.

¹⁵ La, dife pou detri ou; ou pou ganny masakre par lepe. Ou pou ganny devore parey sotrel. Ou zabitan i enn lo lot parey bann sotrel!

¹⁶ Ou bann marsan ti pli nonbre ki zetwal dan lesyel. Aprezan zot in disparet, parey sotrel, zot in ouver zot lezel e anvole.

¹⁷ Ou bann gard i parey bann kasbol; ou bann zofisye i parey en group sotrel ki'n apoz lo bann touf zarbis ler i fer fre. Kan soley i leve, zot anvole e zot ale; personn pa konnen kote zot ti ete.

¹⁸ Lerwa Asiri! Ou bann sef pe dormi; ou bann gerye nepli bouze. Ou pep in ganny disperse lo bann montanny; napa personn pour rasanble zot.

¹⁹ Napa okenn remed pour ou blesir. Ou bann blesir i mortel. Tou sa ki pou antann ou nouvel, pou bat lanmen. Annefe, personn pa'n kapab sap ou bann kriyote san lafen.