Mise 3 - Labib An Kreol Seselwa

Mise I Denons bann Sef Izrael

¹ Mon ti dir: Ekoute! Zot bann sef dan fanmir Zakob, bann ziz dan fanmir Izrael! Pa zot devre konnen kisisa lazistis?

² Me zot ay sa ki byen e zot kontan sa ki mal. Zot aras lapo lo mon pep, ek laser lo zot lezo.

³ Zot devor laser mon pep, deplis lapo lo zot, kas zot lezo an morso, e koup zot konmsi lavyann ki ou met kwi dan marmit.

⁴ Apre, zot pou kriy ver SENYER, me i pa pou reponn zot. I pou tourn son ledo avek zot dan sa moman, akoz zot bann move mannyer fer.

⁵ La sa ki SENYER i deklare kont bann profet ki'n egar mon pep: Lape, kan zot annan keksoz pour manze. Me zot deklar lager kont sa bann ki pa donn zot manze.

⁶ Pour sa rezon, lannwit pou tonm lo zot. Zot pa pou ganny okenn vizyon ankor. Fernwanr pou tonm lo zot san revelasyon ankor. Soley pou kous lo sa bann profet: Lizour, zot pou dan fernwanr.

⁷ Bann ki predir lavenir, pou dan konfizyon, bann deviner pou dan laont! Zot tou, zot pou reste kozpa, akoz Bondye pa reponn zot.

⁸ Me mwan, mon ranpli avek lafors, avek lespri SENYER, lazistis ek kouraz, pour denons Zakob son bann lenfidelite e Izrael, son pese.

⁹ Ekoute! Zot bann sef dan fanmir Zakob, bann ziz dan fanmir Izrael! Zot ay lazistis; zot tordi tou sa ki drwat.

¹⁰ Zot konstri Siyon dan disan e Zerizalenm lo lenzistis.

¹¹ Son bann sef i rann zizman kont gous; son bann pret i fer peye pour ansennyen; son bann profet i predir lavenir pour larzan. Pourtan, zot kont lo SENYER, e zot dir: SENYER i avek nou. Okenn maler pa pou tonm lo nou!

¹² Alor, akoz ou, fose pou ganny fouye dan Siyon, Zerizalenm pou vin en ta debri. Montanny kot tanp i ete pou ganny kouver avek brousay.