Matye 9 - Labib An Kreol Seselwa

Zezi I Geri En Zonm Paralize

¹ Zezi ti mont dan kannot, travers lak e retourn dan son lavil.

² Dimoun ti anmenn kot li en zonm paralize lo en lanmak. Kan zezi ti war lafwa sa bann dimoun, i ti dir avek sa zonm paralize, “Pran kouraz, mon garson, ou pese in ganny pardonnen.”

³ Serten profeser Lalwa ki ti la, ti dir ant zot, “Sa zonm pe blasfenmen.”

⁴ Me Zezi ti konn tou sa ki ti pe pase dan zot lespri. I ti demann zot, “Akoz zot pe mazin tou sa bann move keksoz dan zot leker?

⁵ Kwa ki pli fasil dir: Ou pese in ganny pardonnen oubyen: Leve, marse?

⁶ Me pour mwan fer zot konnen ki Fis-de-Lonm i annan lotorite lo later pour pardonn pese,” Zezi ti dir avek sa zonm paralize, “Leve, pran ou lanmak e al kot ou!”

⁷ Sa zonm ti leve e al kot li.

⁸ Kan lafoul ti war sa, zot ti ranpli avek lafreyer e zot ti loue Bondye ki'n donn zonm en tel lotorite.

Zezi I Apel Matye

⁹ Zezi ti kit sa lavil. An pasan, i ti war en zonm ki ti apel Matye, asize dan biro taks. Zezi ti dir li, “Swiv mwan!” Matye ti leve e i ti swiv Zezi.

¹⁰ Plitar, letan Zezi ti pe manze kot Matye, en kantite kolekter taks ek bann dimoun ki ti annan move repitasyon, ti vin manz avek Zezi ek son bann disip.

¹¹ Serten bann Farizyen ti war sa e zot ti demann avek son bann disip, “Akoz zot met i manz avek bann kolekter taks ek bann peser?”

¹² Zezi ti antann sa. I ti dir zot, “Pa dimoun ki annan lasante ki bezwen dokter, me bann ki malad.

¹³ Al rode ki savedir sa bann parol Lekritir: Konpasyon ki mon oule, pa sakrifis zannimo. Annefe mon pa'n vin apel bann dimoun ki zis, me bann peser.”

Konsernan Zenn

¹⁴ Alor, bann disip Zanbatis ti vin demann Zezi, “Akoz nou ek bann Farizyen nou souvan zennen, me ou bann disip pa zanmen fer zenn?”

¹⁵ Zezi ti reponn zot, “Eski bann envite dan en maryaz i kapab tris, letan nouvo marye i avek zot? Me ler pou arive kan nouvo marye pou nepli avek zot. Alor, la zot ava zennen.”

¹⁶ “Personn pa pyeste en vye lenz avek en morso latwal nef. Si i fer li, sa morso latwal nef pou retresi e desir en pli gran morso dan sa lenz.

¹⁷ Anplis, personn pa met diven nef dan bann vye sak diven, akoz zot pou desire. Diven pou koule e bann sak diven pou perdi. O kontrer, fodre met diven nef dan bann sak diven nef, pour ki zot byen konserve.”

Fiy En Sef Zwif ek En Fanm ki Tous Lenz Zezi

¹⁸ Pandan ki Zezi ti pe koz avek zot, enn bann sef ti vin kot li. I ti tonm azenou devan Zezi. I ti dir, “Mon fiy i fek mor. Vini e poz ou lanmen lo li e i ava viv.”

¹⁹ Alor, Zezi ti leve e i ti swiv sa sef avek son bann disip.

²⁰ En fanm ki ti soufer avek en lemorazi depi 12 an, ti vin deryer Zezi e tous bor son lenz.

²¹ I ti dir dan li menm: Si mon kapab zis tous son lenz, mon pou geri.

²² Zezi ti vire e i ti war li. I ti dir, “Fiy! Pran kouraz! Ou lafwa in geri ou.” Deswit sa fanm ti geri.

²³ Zezi ti ariv dan lakour sa sef. Kan i ti war bann zwer laflit pare pour lanterman, ek lafoul ki ti pe azite,

²⁴ i ti dir, “Sorti zot tou! Sa fiy pa'n mor, me i pe dormi.” Zot ti riy li.

²⁵ Kan lafoul ti'n ganny met deor, Zezi ti antre dan lasanm. I ti atrap lanmen sa pti fiy ki ti leve.

²⁶ Sa nouvel ti fannen partou dan sa rezyon.

Zezi I Geri De Aveg

²⁷ Koman Zezi ti kit sa landrwa, de zonm aveg ki ti swiv Zezi de lwen, ti kriye, “Garson David! Pran pitye pour nou.”

²⁸ Kan Zezi ti ariv kot lakaz, sa de zonm aveg ti swiv li. Zezi ti demann zot, “Eski zot krwar ki mon kapab geri zot?” Zot ti reponn li, “Wi, Senyer.”

²⁹ Alor, Zezi ti tous zot lizye. I ti dir, “Zot demann ava ganny realize, dapre zot lafwa.”

³⁰ Zot lizye ti ouver. Zezi ti koz avek zot severman, “Atansyon! Pa les personn konn sa.”

³¹ Me zot ti al fann sa nouvel partou dan sa rezyon.

Zezi I Geri En Kozpa

³² Zis koman sa de zonm ti pe ale, dimoun ti anmenn kot Zezi en lot zonm ki pa ti koze, akoz i ti posede par en demon.

³³ Zezi ti sas sa demon, e deswit sa kozpa ti konmans koze. Tou dimoun ti etonnen. Zot ti dir, “Zanmen dimoun in war keksoz parey dan Izrael!”

³⁴ Me bann Farizyen ti dir, “Se sef bann demon ki donn li pouvwar pour sas sa bann lespri.”

Zezi I Pran Pitye pour Lafoul

³⁵ Zezi ti pas partou dan bann lavil e tou bann vilaz. I ti ansenny dan zot bann sinagog e pres Bonn Nouvel Rwayonm. I ti geri tou bann maladi ek tou bann diformite.

³⁶ Son leker ti ranpli avek konpasyon pour lafoul ki i ti war, akoz zot ti fatige e dekouraze. Zot ti parey bann mouton san berze.

³⁷ Alor, i ti dir avek son bann disip, “I annan en gran rekolt pour fer, me napa ase travayer.

³⁸ Alor, priye pour ki met rekolt i anvoy plis travayer pou fer sa rekolt.”