Matye 28 - Labib An Kreol Seselwa

Rezireksyon Zezi

¹ Apre saba, byen granmaten premye zour lasemenn, Mari Madlenn ek lot Mari ti al get tonbo.

² En kou angran, ti annan en gro tranblemandter: En lanz Senyer ti desann sorti dan lesyel. I ti'n roul sa ros e asiz lo la.

³ Son laparans ti parey zekler e son lenz ti blan parey lannez.

⁴ Bann gard ti tranble avek lafreyer; zot ti parey dimoun mor.

⁵ Sa lanz ti dir avek sa de fanm, “Pa per! Mon konnen ki zot pe rod Zezi ki'n ganny krisifye.

⁶ I pa isi; i'n resisite parey i ti'n dir. Vin get landrwa kot zot ti'n met li.

⁷ Al deswit dir son bann disip ki i'n resisite, e i pe al esper zot Galile. Zot ava war li laba! Sanmenm sa ki mon ti annan pour dir zot.”

⁸ Deswit, bann fanm ti kit tonbo. Zot ti per, me zot ti osi ranpli avek lazwa. Zot ti taye pour al donn sa nouvel bann disip.

⁹ Me toutakou, Zezi ti vin rankontre zot. I ti dir zot, “Bonzour!” Zot ti apros li, atrap son lipye e ador li.

¹⁰ Alor Zezi ti dir zot, “Pa per! Al dir mon bann frer vin Galile kot zot ava war mwan.”

Rapor Gard

¹¹ Letan sa bann fanm ti pe ale, en group gard ki ti parmi bann ki ti pe vey latonm, ti al dan lavil e rakont bann gran-pret tou sa ki ti'n arive.

¹² Bann gran-pret ti rasanble bann ansyen. Ansanm, zot ti fer en plan. Zot ti donn bann solda en gro sonm larzan.

¹³ Zot ti donn sa lord, “Zot ava dir: Son bann disip ti vini pandan lannwit e vol son lekor pandan ki nou ti pe dormi.

¹⁴ Si sa zafer i ariv dan zorey gouverner, nou ava konvenk li, pour ki zot pa ganny problenm.”

¹⁵ Bann solda ti pran larzan e fer parey zot ti'n ganny ordonnen. Alor, ziska ozordi, sa zistwar in ganny fannen parmi bann Zwif.

Zezi I Aparet avek Son bann Disip

¹⁶ Sa onz disip ti al Galile, lo montanny kot Zezi ti'n endik zot.

¹⁷ Kan zot ti war li, zot ti ador li, me serten ti annan dout.

¹⁸ Zezi ti apros zot e dir zot, “Mon'n ganny tou pouvwar dan lesyel ek lo later.

¹⁹ Al parmi zabitan bann nasyon, e fer zot vin mon bann disip. Batiz zot lo non Papa, lo non Garson e lo non Lespri Sen.

²⁰ Ansenny zot pour obei tou sa ki mon'n komann zot. Pa oubliye: Mwan, mon pou avek zot tou le zour, ziska lafen lemonn.”