Matye 22 - Labib An Kreol Seselwa

Parabol Festen Maryaz

¹ Zezi ti servi ankor parabol pour koz avek zot.

² I ti dir zot, “Rwayonm lesyel i resanble en lerwa ki ti prepar en festen maryaz pour son garson.

³ I ti anvoy son bann serviter pour al apel son bann envite pour lafet; me zot pa ti oule vini.

⁴ I ti anvoy ankor lezot serviter pour al dir bann envite: Mon'n fini prepar repa. Mon'n touy bann bef ek mon bann zannimo byen gra; tou keksoz in pare; vini pour festen maryaz!

⁵ Me bann envite pa ti pran okenn ka. Enn ti al lo son laferm, en lot ti al fer son komers.

⁶ Lezot ti atrap sa bann serviter, bat zot e touy zot.

⁷ Alor, lerwa ti ankoler. I ti anvoy son larme touy sa bann kriminel e met dife dan zot lavil.

⁸ Apre, i ti apel son bann serviter. I ti dir zot: Mon festen maryaz in pare, me sa bann dimoun pa ti merit ganny envite.

⁹ Alor, al dan tou krwaze semen e envit tou dimoun ki zot war.

¹⁰ Bann serviter ti al dan semen e envit tou dimoun ki zot ti war, sa ki move koman sa ki bon. Alor, lasal ti ranpli.

¹¹ Kan lerwa ti antre pour war son bann envite, i ti remarke ki en zonm pa ti'n met lenz maryaz.

¹² Lerwa ti dir li: Zanmi! Koman ou'n kapab antre isi san met en lenz lafet? Me sa zonm ti reste labous fermen.

¹³ Alor, lerwa ti dir avek bann serviter: Anmar son lipye ek son lanmen e zet li deor dan fernwanr, la kot zot pou plere e grens ledan.”

¹⁴ Zezi ti azoute, “Annefe, bokou in ganny envite, me zis en pti gin ki ganny swazir.”

Kestyon Pey Taks

¹⁵ Alor, bann Farizyen ti al fer konplo pour met Zezi dan pyez par en kestyon.

¹⁶ Zot ti anvoy serten zot bann disip ek serten manm dan parti Herod kot Zezi pou dir li, “Met! Nou konnen ki ou fran e ki ou ansenny semen Bondye dan tou laverite, san les personn enfliyans ou, akoz ou pa fer lapreferans pour personn.

¹⁷ Dir nou, ki ou krwar: Dapre nou Lalwa, eski nou devre pey taks Sezar, wi ou non?”

¹⁸ Me Zezi ki ti konn zot riz, ti dir zot, “Bann ipokrit! Akoz zot pe esey met mwan dan en pyez?

¹⁹ Montre mwan larzan ki zot pey taks avek!” Zot ti donn li en pyes larzan.

²⁰ Zezi ti demann zot, “Figir ek non lekel ki lo la?”

²¹ Zot ti reponn, “Sezar.” Zezi ti dir zot, “Alor, rann Sezar sa ki pour Sezar e rann Bondye sa ki pour Bondye.”

²² Kan zot ti antann sa, zot ti etonnen. Alor, zot ti kit Zezi e zot ti ale.

Lo Size Rezireksyon

²³ Sa menm zour, bann Sadiseen, ki pa krwar dan rezireksyon, ti vin poz Zezi sa kestyon,

²⁴ “Met! Moiz in dir: Si en zonm i mor san zanfan, son frer i bezwen marye avek son fanm pour gard desandans son frer ki'n mor.

²⁵ Ti annan set frer. Premye ti marye e i ti mor san zanfan e les son fanm pour son frer.

²⁶ Demenm dezyenm, apre trwazyenm, ziska ki setyenm ti'n marye avek sa fanm.

²⁷ Finalman, apre zot tou, sa fanm osi ti mor.

²⁸ Zour rezireksyon, i pou vin fanm lekel? Annefe, tou le set frer ti'n marye avek li.”

²⁹ Zezi ti reponn zot, “Zot dan lerer, akoz zot pa konn ni Lekritir, ni pwisans Bondye.

³⁰ Zour rezireksyon pou napa kestyon maryaz; pou napa mari ek fanm. Zot pou viv parey bann lanz dan lesyel.

³¹ Lo size rezireksyon, pa zot i'n lir sa ki Bondye in dir zot:

³² Mwan menm Bondye Abrahanm, Bondye Izaak e Bondye Zakob. Bondye pa Bondye bann mor, me Bondye bann vivan.”

³³ Lafoul ti dan gran letonnman kan zot ti antann lansennyman Zezi.

Pli Gran Komannman

³⁴ Kan bann Farizyen ti aprann ki Zezi ti'n ferm labous bann Sadiseen, zot ti rasanble.

³⁵ Enn parmi zot, en spesyalis Lalwa, ti poz Zezi sa kestyon pour esey met li dan en pyez.

³⁶ I ti demann li, “Met! Lekel pli gran komannman dan Lalwa?”

³⁷ Zezi ti reponn li, “Kontan Senyer ou Bondye avek tou ou leker, avek tou ou et antye, e avek tou ou lespri.

³⁸ Sa i premye e pli gran komannman.

³⁹ Dezyenm komannman i parey: Kontan ou prosen parey ou kontan ou prop lekor.

⁴⁰ Lalwa antye ek lansennyman bann profet i depann lo sa de komannman.”

Lo Size Kris

⁴¹ Ler bann Farizyen ti'n rasanble, Zezi ti poz zot sa kestyon,

⁴² “Ki zot mazinen lo Mesi? I garson lekel?” Zot ti reponn li, “Garson David.”

⁴³ Zezi ti demann zot, “Alor, akoz David, enspire par Lespri, ti apel li Senyer? Annefe, David ti dir:

⁴⁴ Senyer ti dir avek mon Senyer: Asiz lo mon kote drwat, ziska ki mon met ou bann lennmi anba ou lipye.

⁴⁵ Si David ti apel li Senyer, ki mannyer alor, i kapab son garson?”

⁴⁶ Personn pa ti kapab reponn li en sel mo. Depi sa zour, personn pa ti oze poz li ankor kestyon.