Matye 20 - Labib An Kreol Seselwa

Travayer dan Plantasyon Rezen

¹ Avek kwa nou pou konpar Rwayonm lesyel? I parey en propriyeter ki leve granmaten pour anploy bann zouvriye pour travay dan son plantasyon rezen.

² I ti dakor pour pey zot parey labitid: En pyes larzan par zour. Alor, i ti anvoy zot travay dan son plantasyon rezen.

³ I ti sorti ver 9 er; i ti war en bann zonm pe debout nanryen fer dan laplas piblik.

⁴ I ti dir zot, “Zot osi al travay dan mon plantasyon rezen. Mon ava donn zot en lapey ki zis.”

⁵ Alor, zot ti al travay. Midi i ti al ankor; 3 er osi, e i ti fer menm zafer.

⁶ I ti al ankor ver 5 er apremidi. I ti war en lot group zonm pe debout dan laplas piblik. I ti demann zot, “Akoz zot reste isi lazournen antye nanryen fer?”

⁷ Zot ti reponn, “Akoz personn pa'n anploy nou.” Sa zonm ti dir zot, “Zot osi, al travay dan mon plantasyon rezen.”

⁸ Ler fernwanr ti pe fer, sa propriyeter ti dir son konmander, “Apel tou bann travayer e pey zot pour zot lazournen travay. Konmans avek sa bann ki ti vin dernyen e fini avek sa ki ti vin premye.”

⁹ Bann zonm ki ti konmans travay 5 er ti ganny sakenn en pyes larzan.

¹⁰ Kan ti'n ariv tour sa bann ki ti ganny anploye premye, zot ti krwar ki zot ti pou ganny plis. Me zot osi, zot ti ganny en pyes larzan.

¹¹ Zot ti pran zot larzan e zot ti al plenny avek propriyeter.

¹² Zot ti dir li, “Sa bann travayer ki ti ganny anploye an dernyen in travay pour zis enn erdtan e zot in ganny peye parey nou ki'n travay lazournen antye dan sa gro ker soley?”

¹³ Sa propriyeter ti reponn avek enn parmi zot, “Gete zanmi! Mon pa'n tronp ou. Pa ou ti tonm dakor avek mwan pour travay en lazournen pour en pyes larzan?

¹⁴ Alor, pran ou larzan e ale. Mon anvi pey parey ou, sa bann ki mon ti anploy an dernyen.

¹⁵ Eski mon napa drwa fer sa ki mon oule avek mon prop larzan? Oubyen, eski ou zalou, akoz mon bon?”

¹⁶ Zezi ti azoute, “Konmsa ki bann ki dernyen pou vin premye e bann ki premye pou vin dernyen.”

Zezi I Anons Trwazyenm Fwa Son Lanmor

¹⁷ Letan Zezi ti pe mont Zerizalenm, i ti anmenn son douz disip alekar. I ti dir zot,

¹⁸ “Ekout byen! La nou pe mont Zerizalenm. Fis-de-Lonm pou ganny livre dan lanmen bann gran-pret ek bann profeser Lalwa. Zot pou kondann li anmor,

¹⁹ e zot pou livre li dan lanmen bann non-Zwif. Zot pou monk li, fwet li e krisifye li. Me trwazyenm zour i pou resisite.”

Reket Manman Zak ek Zan

²⁰ Alor, manman bann garson Zebede ti apros Zezi avek son de garson. I ti azenou devan Zezi e demann li en faver.

²¹ Zezi ti dir li, “Ki ou oule mon fer pour ou?” I ti reponn, “Promet mwan ki kan ou ava dan ou rwayonm, mon de garson ava asiz, enn lo ou kote drwat e lot lo ou kote gos.”

²² Zezi ti reponn, “Zot pa konnen ki zot pe demande. Eski zot pou kapab bwar sa lakoup ki mon pou bwar?” Zot ti reponn, “Nou kapab.”

²³ Zezi ti dir zot, “Zot ava bwar mon lakoup. Me lekel ki pou asiz lo mon kote drwat oubyen mon lo kote gos, sa pa mwan ki deside. Sa bann plas i pour sa bann ki mon Papa in prepare.”

²⁴ Kan lezot dis disip ti antann sa, zot ti ankoler avek sa de frer.

²⁵ Alor, Zezi ti apel zot ansanm. I ti dir zot, “Zot konnen: Bann ki konmann bann nasyon, i domin lo zot koman met. Bann ki sef, zot fer santi zot lotorite.

²⁶ Me i pa devre konmsa parmi zot. O kontrer, si enn parmi zot i oule vin enportan, i bezwen vin zot serviter.

²⁷ Sa enn ki oule vin premye parmi zot, i bezwen vin zot lesklav.

²⁸ Dan sa menm fason, Fis-de-Lonm pa'n vini pour ganny servi, me pour servi e donn son lavi koman pri pour liber bokou dimoun.”

Zezi I Geri De Aveg

²⁹ Letan Zezi ti pe sorti Zeriko, en gran lafoul ti swiv li.

³⁰ Alor, de zonm aveg ki ti pe asiz obor semen, ti tande ki Zezi ti pe pase. Zot ti konmans kriye, “Met! Garson David, pran pitye pour nou!”

³¹ Lafoul ti reprimann zot e esey fer zot reste trankil. Me zot ti kriy ankor pli for, “Met! Garson David, pran pitye pour nou!”

³² Zezi ti arete e apel zot. I ti demann zot, “Ki zot oule ki mon fer pour zot?”

³³ Zot ti reponn, “Senyer, fer nou war kler.”

³⁴ Zezi ti pran pitye pour zot. I ti tous zot lizye. Deswit, sa de zonm ti kapab war kler e zot ti swiv Zezi.