Matye 2 - Labib An Kreol Seselwa

Bann Savan I Rann Vizit Zezi

¹ Zezi ti ne Betlehenm dan Zide, dan lepok ki Herod ti lerwa. Apre son nesans, bann savan sorti dan Les ti ariv Zerizalenm.

² Zot ti demande, “Oli sa lerwa bann Zwif ki fek ne? Nou'n war son zetwal dan Les, e nou'n vin ador li.”

³ Lerwa Herod ek tou dimoun dan Zerizalenm ti trakase kan zot ti antann sa.

⁴ I ti apel tou bann gran-pret ek bann profeser Lalwa. I ti demann zot, “Kote Mesi ti devre ne?”

⁵ Zot ti reponn, “Betlehenm dan Zide. La sa ki profet in ekri:

⁶ Ou Betlehenm, dan later Zida! Ou sertennman pa mwen enportan parmi bann lavil dan Zida. Annefe, kot ou, pou sorti en sef ki pou vin berze Izrael, mon pep.”

⁷ Alor, an sekre, Herod ti apel sa bann saz. I ti demann zot lepok egzakt ki sa zetwal ti aparet.

⁸ Apre, i ti anvoy zot Betlehenm. I ti dir zot, “Al rod byen lenformasyon lo sa zanfan. Kan zot ava'n war li, vin fer mwan konnen, pour ki mwan osi, mon ava al ador li.”

⁹ Apre ki lerwa ti'n fini koz avek zot, zot ti ale. Alor, zot ti war sa menm zetwal ki zot ti'n remarke dan Les, pe avanse devan zot.

¹⁰ Kan zot ti revwar sa zetwal, zot ti dan en gran kontantman.

¹¹ Zot ti antre dan lakaz; zot ti war sa zanfan avek son manman, Mari. Zot ti tonm azenou e ador li. Answit, zot ti ouver zot kof e ofer li bann kado: Lor, lansan ek lamir.

¹² Apre, zot ti retourn se zot par en lot semen, akoz Bondye ti'n averti zot dan en rev pour pa retourn kot Herod.

Depar pour Lezip

¹³ Apre ki bann savan ti'n ale, en lanz Senyer ti aparet avek Zozef dan en rev. I ti dir li, “Leve! Pran sa zanfan ek son manman e sov Lezip. Reste laba, ziska ki mon donn ou lord retournen, akoz Herod pou rod sa zanfan pour fer touy li.”

¹⁴ Zozef ti leve. I ti pran sa zanfan ek son manman e pandan lannwit, i ti sov Lezip.

¹⁵ I ti reste laba ziska lanmor Herod. Sa ti arive pour ki sa ki Senyer ti'n dir par lentermedyer son profet, i ganny realize: Mon'n apel mon garson pour sorti Lezip.

Herod I Fer Touy bann Zanfan

¹⁶ Kan Herod ti realize ki sa bann savan ti'n zwe en trik avek li, i ti tre ankoler. I ti fer touy tou bann garson 2 an e mwens, dan Betlehenm e dan zalantour, dapre lepok ki sa bann savan ti'n dir li.

¹⁷ Sa ti arive pour ki parol profet Zeremi i ganny akonpli:

¹⁸ Dan Rama mon antann en lavwa pe plere e pe lamante. Rasel pe pler son bann zanfan; i refiz tou konsolasyon, akoz zot in mor.

Retour Sorti Lezip

¹⁹ Apre lanmor Herod, en lanz ti aparet avek Zozef Lezip, dan en rev.

²⁰ I ti dir li, “Leve! Pran sa zanfan ek son manman e retourn dan pei Izrael, akoz sa bann ki ti pe esey touy li in mor.”

²¹ Alor, Zozef ti leve. I ti pran sa zanfan ek son manman, e retourn dan pei Izrael.

²² Me kan Zozef ti tande ki Arkelais ti'n vin lerwa Zide dan plas son papa Herod, i ti per pour al laba. Apre ki i ti'n ganny averti dan en rev, i ti al dan rezyon Galile.

²³ I ti al etabli li dan en lavil ki ti apel Nazaret. Alor, parol bann profet ti ganny realize: I pou ganny apele Nazareen.