Matye 18 - Labib An Kreol Seselwa

Lekel ki Pli Enportan

¹ Dan sa letan, bann disip ti vin kot Zezi e demann li, “Lekel ki pli gran dan Rwayonm lesyel?”

² Zezi ti apel en pti zanfan e plas li dan milye zot.

³ I ti dir, “Mon dir zot, sa i laverite: Si zot pa sanze e vin parey bann zanfan, zot pa pou zanmen antre dan Rwayonm lesyel.

⁴ Sa enn ki abes li e vin parey sa zanfan, pou vin pli gran dan Rwayonm lesyel.

⁵ Sa enn ki resevwar en zanfan an mon non, parey sa enn, se mwan ki i pe resevwar.”

Lavertisman

⁶ “Me sa dimoun ki fer tonm dan pese enn sa bann pti zanfan ki krwar dan mwan, ti ava preferab pour li, ki en gro ros i ganny anmare otour son likou e ki i ganny zete dan fon lanmer.

⁷ Maler pour lemonn! I annan bokou tantasyon pour fer dimoun tonbe! Byen sir, tantasyon i la. Me maler pour sa dimoun ki fer sa arive.

⁸ Si ou lanmen oubyen ou lipye i fer ou komet pese, koup li e zet li lwen avek ou. Vomye ou antre dan vre lavi avek en sel lanmen oubyen en sel lipye, ki annan tou le de lanmen, tou le de lipye e ganny zet dan dife eternel.

⁹ Si ou lizye i fer ou komet pese, aras li e zet li lwen avek ou. Vomye ou antre dan lavi avek en sel lizye, ki annan tou le de lizye e ganny zete dan dife lanfer.”

Parabol Mouton Perdi

¹⁰ “Fer sir ki zot pa mepriz okenn sa bann pti zanfan. Annefe, mon dir zot: Zot bann lanz i toultan dan prezans mon Papa ki dan lesyel.

¹¹ Annefe, Fis-de-Lonm in vin sov sa ki'n perdi.

¹² Ki zot mazinen? Si en dimoun i annan 100 mouton e i perdi enn, pa i pou kit sa 99 mouton lo montanny, pour al rod sa enn ki'n perdi?

¹³ Mon dir zot, sa i laverite: Si i retrouv li, i pou pli ere pour sa sel mouton, ki pour sa 99 ki pa'n egare.

¹⁴ Dan menm fason, i pa lavolonte zot Papa ki dan lesyel, pour ki en sel sa bann pti zanfan i perdi.”

Kan En Frer I Fer Pese

¹⁵ “Si ou frer in ofans ou, al rod li e montre li son fot, li tousel, zis ant zot de. Si i ekout ou, ou ava'n reganny ou frer.

¹⁶ Me si i refize ekout ou, anmenn enn, oubyen de dimoun avek ou, pour ki sa zafer i ganny regle lo parol de oubyen trwa temwen.

¹⁷ Me si i refize ekout zot, dir tou avek Legliz. Si i refize ekout Legliz, ou ava konsider li koman en non-Zwif oubyen en kolekter taks.

¹⁸ Mon dir zot, sa i laverite: Sa ki zot anmare lo later pou ganny anmare dan lesyel. Sa ki zot delarge lo later pou ganny delarge dan lesyel.

¹⁹ Mon dir zot ankor: Si de parmi zot lo later i tonm dakor ansanm pour priy pour nenport kwa, mon Papa ki dan lesyel ava akord zot sa ki zot demande.

²⁰ Annefe, la kot de oubyen trwa dimoun in rasanble an mon non, mon pou la parmi zot.”

Parabol Serviter San Pitye

²¹ Alor, Pyer ti vin kot Zezi e demann li, “Senyer, si mon frer in ofans mwan, konbyen fwa mon devre pardonn li? Ziska set fwa?”

²² Zezi ti reponn li, “Non, pa set fwa, me 70 fwa set fwa.

²³ Annefe, Rwayonm Bondye i kapab ganny konpare avek en lerwa ki ti deside regle son kont avek son bann serviter.

²⁴ I ti fek konmans konte, kan zot ti anmenn li en zonm ki ti dwa li plizyer milyon pyes larzan.

²⁵ Koman sa zonm ti napa ase pour pey son det, lerwa ti ordonn vann li, son fanm, son bann zanfan ek tou sa ki i ti posede, pour li pey son det.

²⁶ Sa serviter ti tonm azenou devan son met. I ti sipliy li: Pran pasyans anver mwan, e mon ava pey ou tou.

²⁷ Son met ti pran pitye pour li. I ti efas tou son det e les li ale.

²⁸ Sa serviter ti sorti e i ti zwenn enn son koleg travay ki ti dwa li 100 pyes larzan. I ti atrap sa zonm par lagorz e konmans trangle li. I ti dir li: Pey mwan sa ki ou dwa mwan!

²⁹ Son koleg travay ti tonm dan son lipye e sipliy li: Pran pasyans anver mwan e mon ava pey ou.

³⁰ Me i ti refize. I ti fer met li dan prizon ziska ki i pey tou sa ki i ti dwa li.

³¹ Kan lezot serviter ti war sa, zot ti vin tre tris e zot ti al rakont zot met tou sa ki ti'n pase.

³² Alor, sa met ti fer apel sa serviter. I ti dir li: Ou en move serviter! Mon'n fek efas tou ou det akoz ou'n sipliy mwan.

³³ Ou osi, pa ou ti devre pran pitye pour ou kanmarad, parey mon ti pran pitye pour ou?

³⁴ Son met ti byen ankoler e i ti anvoy sa zonm dan prizon pour pini li ziska ki i pey tou son det.”

³⁵ Zezi ti azoute, “Konmsa ki mon Papa ki dan lesyel pou fer avek zot, si zot pa pardonn zot frer avek tou zot leker.”