Mark 8 - Labib An Kreol Seselwa

Zezi I Nouri Kat Mil Zonm

¹ En lot zour, ti annan ankor en gran lafoul ki ti'n rasanble. Zot ti napa nanryen pour manze. Alor, Zezi ti apel son bann disip. I ti dir zot,

² “Mon annan pitye pour sa lafoul, akoz zot in avek mwan depi trwa zour; zot napa nanryen pour manze.

³ Si mon fer zot ale, zot pou tonm feb lo semen. I annan serten parmi zot ki'n sorti lwen.”

⁴ Son bann disip ti reponn li, “Kote nou pou ganny ase dipen dan sa landrwa dezer, pour nou nouri tou sa dimoun?”

⁵ Zezi ti demann zot, “Konbyen dipen zot annan?” Zot ti reponn, “Set.”

⁶ Alor, i ti donn lord lafoul pour asiz ater. I ti pran sa set dipen; i ti remersye Bondye; i ti kase e donn son bann disip pour distribye avek lafoul. Bann disip ti partaz avek lafoul.

⁷ Zot ti annan osi detrwa pti pwason. Zezi ti beni zot e donn son bann disip pour distribye avek lafoul.

⁸ Tou dimoun ti manze ziska zot ti rasazye. Bann disip ti anmas set pannyen plen avek bann morso ki ti reste.

⁹ Pourtan, ti annan anviron 4,000 dimoun. Apre, Zezi ti fer zot ale.

¹⁰ Deswit, i ti anbark dan en kannot avek son bann disip e i ti al dan rezyon Dalmanouta.

Bann Farizyen I Demann En Mirak

¹¹ Bann Farizyen ti arive e zot ti konmans diskit avek Zezi. Pour teste li, zot ti demann li en siny sorti dan lesyel.

¹² Zezi ti pran en gran respirasyon. I ti dir, “Akoz sa zenerasyon i demann en siny? Mon dir zot, sa i laverite: Sa zenerasyon pa pou ganny okenn siny.”

¹³ Apre, i ti kit zot. I ti remont dan kannot pour al lo lot kote lak.

Lelven bann Farizyen ek Herod

¹⁴ Bann disip ti'n oubliye anmenn dipen. Zot ti annan zis en dipen dan kannot.

¹⁵ Zezi ti fer zot sa rekomandasyon, “Fer atansyon lelven bann Farizyen ek lelven Herod.”

¹⁶ Zot ti konmans diskit ant zot akoz ti napa dipen.

¹⁷ Zezi ti konnen lo kwa zot ti pe diskite. I ti dir zot, “Akoz zot pe diskite ki zot napa dipen? Zot pa ankor konpran? Zot pa ankor sezi? Eski zot leker i fermen?

¹⁸ Zot annan lizye, me zot pa war kler? Zot annan zorey, me zot pa tande? Zot pa rapel:

¹⁹ Kan mon ti kas sa senk dipen pour nouri 5,000 zonm, konbyen pannyen plen avek bann restan ki zot ti ranmase?” Zot ti reponn, “Douz.”

²⁰ “E kan mon ti kas sa set dipen pour 4,000 zonm, konbyen pannyen plen avek bann restan ki zot ti ranmase?” Zot ti reponn, “Set.”

²¹ Alor Zezi ti dir zot, “E zot pa ankor konpran?”

Zezi I Geri En Zonm Aveg dan Betsayda

²² Zezi ek son bann disip ti ariv Betsayda. La, dimoun ti anmenn en zonm aveg kot Zezi e sipliy li pour tous sa zonm.

²³ Zezi ti atrap lanmen sa zonm e anmenn li an deor vilaz. I ti met lasaliv lo son lizye, poz lanmen lo li e demann li, “Eski ou war keksoz?”

²⁴ Sa aveg ti lev latet, i ti gete e i ti dir, “Mon war dimoun, me zot parey bann pye dibwa ki pe marse.”

²⁵ Zezi ti poz son lanmen ankor lo son lizye. Sa zonm ti get drwat devan li: I ti war byen. I ti'n geri. I ti war tou keksoz kler.

²⁶ Alor, Zezi ti anvoy li se li. I ti dir li, “Pa ni menm antre dan vilaz.”

Pyer I Deklare ki Zezi Li menm Kris

²⁷ Zezi ek son bann disip ti al dan bann vilaz pros avek Sezare Filipi. Dan semen, i ti kestyonn son bann disip, “Ki dimoun i dir mon ete?”

²⁸ Zot ti dir li, “Zanbatis; me en bann i dir, Eli; en lot bann ankor i dir ki ou enn bann profet.”

²⁹ Zezi ti demann zot, “Me zot, ki zot dir mon ete?” Pyer ti reponn li, “Ou menm Mesi.”

³⁰ Alor, Zezi ti ordonn zot pour pa dir nanryen lo li.

Zezi I Anons Son Lanmor ek Son Rezireksyon

³¹ Apre sa, Zezi ti ansenny son bann disip, “Fis-de-Lonm i bezwen soufer bokou e ganny rezete par bann ansyen, bann gran-pret, bann profeser Lalwa e ganny met anmor. Me apre trwa zour, i pou resisite.”

³² I ti dir zot sa tre klerman. Alor Pyer ti anmenn li alekar e repros li.

³³ Me Zezi ti vire e get son bann disip; i ti reprimann Pyer severman, “Ale, sorti la, Satan! Ou pa mazin parey Bondye, me parey zonm.”

³⁴ Apre, Zezi ti apel lafoul ek son bann disip. I ti dir zot, “Sa enn ki oule swiv mwan, fodre ki i aret mazin zis li. I devre pran son lakrwa e swiv mwan.

³⁵ Annefe, tou dimoun ki anvi sov son lavi, pou perdi li. Me sa enn ki perdi son lavi akoz mwan e akoz Bonn Nouvel, pou sov li.

³⁶ Ki lavantaz i annan pour en zonm ganny lemonn antye, si i perdi son lavi?

³⁷ Ki en zonm i kapab donnen an retour pour son lavi?

³⁸ Annefe, sa enn ki onte akoz mwan ek mon bann parol parmi sa zenerasyon adilter, ranpli avek pese, Fis-de-Lonm osi pou onte pour li, kan i pou vini dan mazeste son Papa avek bann lanz sen.”