Mark 6 - Labib An Kreol Seselwa

Zabitan Nazaret pa Krwar dan Zezi

¹ Zezi ti kit sa landrwa e al dan lavil kot i ti grandi. Son bann disip ti swiv li.

² Zour saba, i ti ansennyen dan sinagog. En kantite dimoun ki ti antann li, ti etonnen. Zot ti dir, “Kote in konn tousala? Kote i ganny sa lasazes? Ki mannyer i kapab fer sa bann mirak?

³ Pa li sa sarpantye, garson Mari? Zak, Zoze, Zid ek Simon pa son bann frer? Son bann ser, pa zot reste isi menm parmi nou?” Pour sa rezon, zot pa ti oule krwar li.

⁴ Alor, Zezi ti dir zot, “En profet i ganny respekte partou, sof dan son lavil, dan son fanmir e dan son prop pei.”

⁵ I pa ti kapab fer okenn mirak la, apar poz lanmen lo detrwa dimoun malad ki i ti geri.

⁶ I ti etonnen ki zot ti mank lafwa konmsa. Answit, Zezi ti al ansenny dan bann vilaz alantour.

Zezi I Anvoy Son Douz Disip De par De

⁷ I ti apel son 12 disip e anvoy zot de par de. I ti donn zot lotorite lo bann move lespri.

⁸ I ti fer zot sa bann rekomandasyon, “Pa anmenn nanryen avek zot pour zot vwayaz, me zis en baton. Pa pran ni dipen, ni sak, ni larzan dan zot sang.

⁹ Met bann sandal, me anmenn zis en lenz.”

¹⁰ I ti osi dir zot, “Kan zot antre dan en lakaz, reste ziska ki zot kit sa landrwa.

¹¹ Si dan en landrwa, bann zabitan pa resevwar zot, ni ekout zot, kit sa landrwa. Sekwe lapousyer ki avek zot lipye: Sa i ava en temwannyaz kont sa bann dimoun.”

¹² Alor, bann disip ti ale. Zot ti proklanmen ki tou dimoun i devre sanz zot mannyer viv.

¹³ Zot ti sas bokou demon e zot ti fer lonksyon avek delwil lo en kantite malad ki zot ti geri.

Lanmor Zanbatis

¹⁴ Lerwa Herod ti aprann tou sa ki Zezi ti pe fer, akoz son repitasyon ti'n fannen partou. Serten ti pe dir: Zanbatis in resisite. Pour sa rezon ki i annan pouvwar pour fer bann mirak.

¹⁵ Me i annan ki ti pe dir: Sa Eli! Oubyen ankor: I en profet, parey enn nou bann profet lontan.

¹⁶ Me kan Herod ti antann sa, i ti dir, “Sa Zanbatis ki mon'n fer koup likou. Li menm ki'n resisite.”

¹⁷ Annefe, Herod ti'n fer aret Zan e fer ansenn li dan prizon akoz Herodyad, fanm son frer, Filip. Herod ti'n pran Herodyad koman son prop fanm.

¹⁸ Zan ti'n dir Herod, “Ou napa drwa pran fanm ou frer.”

¹⁹ Alor Herodyad ti gard en rankin kont Zan e i ti anvi fer touy li, me i pa ti kapab.

²⁰ Annefe, Herod ti annan en gran respe pour Zan, akoz i ti konnen ki Zan ti en zonm zis e sen. I ti protez li. Kan i ti ekout Zan, i ti trouv li bokou anbarase; pourtan, i ti pran plezir ekout li.

²¹ Sepandan, en bon lokazyon ti prezante kan Herod ti ganny son lanniverser. I ti fer en gran parti pour tou bann zofisye dan pale, bann sef larme ek bann dimoun enportan dan Galile.

²² Fiy Herodyad ti antre e danse. I ti fer Herod ek son bann envite kontan. Alor Herod ti dir avek sa zenn fiy, “Demann mwan sa ki ou anvi e mon ava donn ou.”

²³ I ti fer sa serman avek li, “Tou sa ki ou ava demann mwan mon pou donn ou, menm lanmwatye mon rwayonm.”

²⁴ Sa fiy ti sorti e i ti dir avek son manman, “Ki mon pou demande?” I ti reponn li, “Latet Zanbatis.”

²⁵ Deswit, sa fiy ti retourn kot lerwa. I ti dir li, “Mon oule ki ou donn mwan konmela menm, latet Zanbatis lo en pla.”

²⁶ Lerwa ti byen sagren, me akoz son promes devan son bann envite, i pa ti kapab refize.

²⁷ Deswit alor, i ti anvoy en solda avek lord pour anmenn latet Zanbatis. Sa solda ti al dan prizon e sot latet Zanbatis.

²⁸ Apre, i ti anmenn sa latet lo en pla. I ti donn sa pla avek sa zenn fiy ki ti anmenn kot son manman.

²⁹ Kan bann disip Zan ti antann sa, zot ti vin pran son lekor, e met li dan en tonbo.

Zezi I Nouri Senk Mil Zonm

³⁰ Bann zapot ti retourn kot Zezi e rakont li tou sa ki zot ti'n fer e ansennyen.

³¹ Alor, Zezi ti dir zot, “Vin avek mwan dan en landrwa trankil kot zot ava kapab repoz en pe.” Annefe, ti annan telman dimoun ki ti pe ale vini, ki zot pa ti ganny letan pour manze.

³² Alor, zot ti al dan en kannot, tousel dan en landrwa trankil.

³³ Me bokou dimoun ti rekonnet zot e ti war zot pe ale. Zot ti sorti dan bann lavil an tayan e ariv laba avan Zezi ek son bann disip.

³⁴ Kan Zezi ti debarke, i ti war en gran lafoul. I ti pran pitye pour zot, akoz zot ti parey bann mouton san berze. I ti ansenny zot bokou keksoz.

³⁵ Ti deza tar kan bann disip ti apros Zezi. Zot ti dir li, “I deza tar e nou dan en landrwa izole.

³⁶ Fer sa bann dimoun ale, pour zot kapab al dan lakanpanny ek bann vilaz alantour, pour zot aste dekwa manze.”

³⁷ Zezi ti reponn zot, “Donn zot keksoz pour manze zot menm.” Zot ti demann li, “Eski nou pou depans 200 pyes larzan pour aste dipen pour zot manze?”

³⁸ Alor Zezi ti demann zot, “Konbyen dipen zot annan? Al gete.” Kan zot ti'n konnen, zot ti vin dir li, “Senk dipen ek de pwason.”

³⁹ Alor, Zezi ti donn lord son bann disip pour fer sa bann dimoun asiz an group lo zerb ver.

⁴⁰ Zot ti asiz an group 100 e an group 50.

⁴¹ Apre sa, Zezi ti pran sa senk dipen ek sa de pwason. I ti lev lizye ver lesyel e remersye Bondye. I ti kas sa senk dipen e i ti donn son bann disip pour distribye avek lafoul. I ti partaz osi sa de pwason avek zot tou.

⁴² Tou dimoun ti manze ziska zot ti rasazye.

⁴³ Bann disip ti ranpli 12 pannyen avek bann morso pwason ki ti reste.

⁴⁴ An tou, ti annan 5,000 zonm ki ti'n manz dipen.

Zezi I Mars lo Delo

⁴⁵ Deswit apre, Zezi ti fer bann disip anbark dan kannot e al avan li lo lot kote lak, ver lavil Betsayda. Pandan sa letan i ti fer lafoul ale.

⁴⁶ Apre ki i ti'n fer zot ale, i ti al lo montanny pour priye.

⁴⁷ Kan fernwanr ti'n fer, kannot ti deza dan milye lak e Zezi ti tousel ater.

⁴⁸ I ti war ki son bann disip ti pe ganny difikilte pour naz zaviron, akoz divan kontrer. Alor, tar dan lannwit, i ti mars lo delo e al zwenn zot. I ti pe al depas zot,

⁴⁹ kan zot ti war li pe mars lo delo. Zot ti krwar en fantonm. Zot ti kriye

⁵⁰ akoz zot tou, zot ti'n war li. Zot ti per. Deswit Zezi ti koz avek zot, “Pran kouraz, mwan sa, pa bezwen per.”

⁵¹ I ti anbark avek zot, e divan ti tonbe. Bann disip ti dan en gran letonnman.

⁵² Annefe, zot pa ti'n konpran mirak dipen, akoz zot lespri ti ankor fermen.

Zezi I Geri bann Malad dan Rezyon Zenezaret

⁵³ Apre ki zot ti'n travers lak, zot ti tous later Zenezaret, e anmar zot kannot.

⁵⁴ Kan zot ti debarke, deswit dimoun ti rekonnet Zezi.

⁵⁵ Alor, zot ti tay partou dan zalantour e konmans anmenn bann malad lo lanmak, dan nenport ki landrwa kot zot ti tande Zezi ti ete.

⁵⁶ Partou kot Zezi ti ale, dan bann vilaz, dan bann lavil oubyen dan bann laferm, zot ti anmenn bann malad dan bann landrwa piblik. Zot ti sipliy li pour les zot tous bout son lenz. Tou bann ki ti tous bout son lenz, ti geri.