Mark 5 - Labib An Kreol Seselwa

Zezi I Geri En Zonm Posede par En Move Lespri

¹ Zezi ek son bann disip ti ariv lo lot kote lak dan pei bann Zerazenyen.

² Koman i ti debarke, en zonm ki ti posede par en move lespri ti sorti parmi bann latonm. I ti vin rankontre Zezi.

³ Sa zonm ti pe reste parmi bann latonm. Personn pa ti kapab anmar li, ni menm avek en lasenn.

⁴ Annefe, souvan, zot ti ansenn li, me i ti kas bann lasenn ek bann feray. Personn pa ti ase for pour kontrol li.

⁵ Lannwit koman lizour, i ti marse parmi bann latonm e dan montanny. I ti kriye, e bles son lekor avek ros.

⁶ Kan i ti war Zezi dan lwen, i ti taye e tonm azenou devan li.

⁷ I ti kriy avek tou son lafors, “Ki ou pe rode avek mwan, Zezi, Garson Bondye Treo? Mon sipliy ou: Lo non Bondye, pa tourmant mwan.”

⁸ Annefe, Zezi ti pe dir li, “Lespri move! Sorti dan sa zonm.”

⁹ Zezi ti kestyonn li, “Koman ou apele?” I ti reponn, “Mon apel Lezyon, akoz i annan en kantite nou.”

¹⁰ I ti sipliye e ensiste avek Zezi pour pa anvoy bann move lespri an deor pei.

¹¹ Ti annan en troupo koson ki ti pe manze lo lapant kolin.

¹² Sa bann move lespri ti sipliy li, “Anvoy nou dan bann koson e les nou antre dan zot.”

¹³ Zezi ti les zot ale. Alor, sa bann move lespri ti sorti e antre dan sa bann koson. Anviron 2,000 koson ti tay dan presipis e tonm dan lak. Zot tou ti noye.

¹⁴ Bann gardyen koson ti taye. Zot ti al dan lavil e dan lakanpanny pour rakont sa ki ti'n arive. Alor, bann dimoun ti vin get sa ki ti'n arive.

¹⁵ Kan zot ti ariv kot Zezi, zot ti war sa zonm ki ti annan bann move lespri pe asize. I ti byen sanze e avek tou son bon sans. Zot ti per.

¹⁶ Dimoun ki ti'n war sa ki ti'n pase, ti rakont zot sa ki ti'n arive avek sa zonm ki ti posede par bann move lespri e avek sa bann koson.

¹⁷ Alor, zot ti sipliy Zezi pour kit zot rezyon.

¹⁸ Pandan ki Zezi ti pe anbark dan kannot, sa zonm ki ti posede par bann demon, ti sipliy li pour les li reste avek li.

¹⁹ Zezi ti refize. I ti dir li, “Retourn se ou, dan ou fanmir e rakont zot tou sa ki Senyer in fer pour ou, e koman i'n pran pitye pour ou.”

²⁰ Sa zonm ti ale e i ti konmans anons dan rezyon Dekapol, tou sa ki Zezi ti'n fer pour li. Tou dimoun ti etonnen.

Fiy Zairis ek En Fanm ki Tous Lenz Zezi

²¹ Zezi ti retourn lot kote lak dan kannot; en gran lafoul ti rasanble otour li. I ti pe debout obor lak.

²² En sef sinagog, ki ti apel Zairis, ti arive. Kan i ti war Zezi, i ti tonm azenou devan li.

²³ I ti sipliy li, “Mon pti fiy i pre pour mor. Vin poz ou lanmen lo li, pour ki i geri e kontinyen viv.”

²⁴ Zezi ti al avek li. En gran lafoul ti swiv li. Zot ti pe pouse lo tou kote.

²⁵ Ti annan la, en fanm ki ti pe soufer avek en lemorazi depi 12 an.

²⁶ I ti'n soufer bokou e i ti'n depans tou son larzan avek en kantite dokter, san okenn rezilta. O kontrer, son leta ti'n vin pli pir.

²⁷ Sa fanm ti'n antann koz lo Zezi. Alor, i ti vin deryer li dan lafoul e tous son lenz.

²⁸ Annefe, i ti'n dir dan li menm: Si mon ti kapab zis tous son lenz, mon ti ava geri.

²⁹ Deswit, sa lemorazi ti arete. I ti santi dan son lekor, ki i ti'n geri.

³⁰ Sa menm moman, Zezi ti remarke ki en lafors ti'n sorti dan li. I ti tourn ver lafoul e demande, “Lekel ki'n tous mon lenz?”

³¹ Son bann disip ti dir li, “Ou war sa lafoul ki pe pouse, e ou demande lekel ki'n tous ou?”

³² Zezi ti get toultour li pour war lekel ki ti'n fer sa.

³³ Sa fanm ti konnen tou sa ki ti'n ariv li. Alor, i ti vin tonm azenou devan Zezi, an tranblan avek lafreyer. I ti dir li tou laverite.

³⁴ Zezi ti dir li, “Mon fiy! Ou lafwa in sov ou. Al anpe; ou'n ganny geri.”

³⁵ Zezi ti ankor pe koze, kan en bann zonm ti arive sorti kot Zairis. Zot ti vin dir Zairis, “Ou fiy in mor. Akfer deranz Met ankor?”

³⁶ Me san tenir kont sa bann parol, Zezi ti dir sa sef sinagog, “Pa bezwen per, zis krwar.”

³⁷ I pa ti les personn akonpanny li, eksepte Pyer, Zak ek son frer Zan.

³⁸ Kan zot ti ariv kot sa sef sinagog, Zezi ti war en gran lazitasyon. Ti annan en bann dimoun ki ti pe plere e kriye.

³⁹ I ti antre e i ti dir zot, “Akoz tou sa lazitasyon? Akoz zot pe plere? Sa fiy pa'n mor, i pe dormi.”

⁴⁰ Me zot ti riy li. Alor, Zezi ti fer zot tou sorti. I ti pran papa ek manman sa fiy, ek sa trwa disip ki ti pe akonpanny li. Zot ti antre dan lasanm sa zanfan.

⁴¹ Zezi ti pran son lanmen. I ti dir li, “Talita koum.” Savedir: Zenn fiy, mon dir ou, leve!

⁴² Deswit, sa pti fiy ti leve e konmans marse. I ti annan douz an. Kan zot ti war sa, zot tou ki ti la, ti dan en gran letonnman.

⁴³ Zezi ti dir zot avek severite pour pa les personn konn sa. Apre i ti dir zot, “Donn sa pti fiy keksoz pour manze.”