Mark 4 - Labib An Kreol Seselwa

Parabol En Senmer Lagrenn

¹ Ankor en fwa, Zezi ti ansennyen obor lak. En lafoul telman gran ti'n rasanble otour li, ki i ti bezwen monte e asiz dan en kannot ki ti la dan delo. Sa gran lafoul ti reste ater, obor delo.

² Zezi ti ansenny zot en kantite keksoz an parabol. I ti dir zot,

³ “Ekoute! En senmer ti sorti pour senm lagrenn.

⁴ Pandan ki i ti pe senmen, en parti lagrenn ti tonm obor semen: Bann zwazo ti vin manz tou.

⁵ En lot parti lagrenn ti tonm parmi bann ros, kot ti napa bokou later: Zot ti pous vit akoz later pa ti profon.

⁶ Me kan soley ti tape, zot ti fletri, zot ti ganny brile e zot ti sek akoz zot ti napa ase rasin.

⁷ En lot parti lagrenn ti tonm parmi bann brousay pikan. Sa bann pye pikan ti pous pli vit e touf zot; zot pa ti raporte.

⁸ En lot parti lagrenn ti tonm dan bon later. Zot ti pouse e grandi; zot ti donn fri: Serten 30, serten 60, e serten 100.”

⁹ Zezi ti dir, “Sa ki annan zorey pour antann, tande!”

Akoz Zezi I Koz an Parabol

¹⁰ Kan Zezi ti tousel, sa bann dimoun ki ti avek li ek son 12 zapot, ti demann li leksplikasyon bann parabol.

¹¹ I ti dir zot, “Zot, zot in resevwar sekre Rwayonm Bondye, me pour bann ki an deor, tou keksoz i an parabol,

¹² pour ki, menm si zot gete, zot pa pou war. Menm si zot ekoute, zot pa pou konpran. Pangar si zot konpran, zot ava konverti, e zot ava ganny pardonnen.”

Zezi I Eksplik Parabol Senmer Lagrenn

¹³ Apre, Zezi ti dir zot, “Zot pa konpran sa parabol? Alor, ki mannyer zot pou konpran tou lezot parabol?

¹⁴ Senmer i senm Laparol.

¹⁵ Bann ki dan bor semen kot Laparol in ganny senmen, se sa bann ki osito zot in antann Laparol, Satan i vini. I aras Laparol ki'n ganny senmen dan zot.

¹⁶ Lagrenn ki'n ganny senmen dan later kot i annan ros, i sa bann ki antann Laparol. Zot resevwar li avek lazwa.

¹⁷ Me akoz zot napa rasin, zot tenir zis pour en pti moman. Kan difikilte ek persekisyon akoz Laparol i arive, deswit zot tonbe.

¹⁸ En lot parti lagrenn ki'n ganny senmen parmi bann plant pikan, se bann ki'n antann Laparol.

¹⁹ Me traka lavi, plezir larises avek tou lezot dezir, i penetre dan zot e touf Laparol. Alor, zot pa prodwir okenn fri.

²⁰ Bann ki'n ganny senmen dan bon later, se bann ki'n antann Laparol. Zot akey li e zot raport bann fri: Serten 30, serten 60 e serten 100.”

Parabol Lalanp

²¹ Apre, Zezi ti dir zot, “Eski ou alim en lalanp pour met li anba en bol, oubyen anba lili? O kontrer, pa i ganny met anler lo en portlanp?

²² Annefe, tou sa ki kasyet pou ganny dekouver e tou sa ki sekre pou ganny devwale.

²³ Dimoun ki annan zorey pour antann, tande.”

²⁴ Zezi ti dir zot ankor, “Fer byen atansyon sa ki zot tande. Mezir ki ou servi pour mezir lezot, pou osi ganny servi pour mezir ou menm; i pou menm ganny azoute.

²⁵ Annefe, sa enn ki deza annan, pou ganny plis, e sa enn ki napa, pou ganny arase menm sa pti gin ki i annan.”

Parabol Lagrenn ki Pous Tousel

²⁶ Zezi ti dir, “Rwayonm Bondye i parey en zonm ki'n senm lagrenn dan later.

²⁷ Ki i pe dormi, oubyen ki i pa pe dormi, bann lagrenn i kontinyen zermen e grandi tousel san ki i konnen koman.

²⁸ Par li menm, later i prodwi larekolt: Dabor son tiz, answit zepi ver e anfen lagrenn ki byen formen dan zepi.

²⁹ Kan dible in mir, sa zonm i pran son fosi akoz i'n ariv ler pour fer rekolt.”

Parabol Lagrenn Moutard

³⁰ Zezi ti dir ankor, “Avek kwa nou pou konpar Rwayonm Bondye, e par ki parabol nou pou reprezant li?

³¹ I parey en lagrenn moutard, ki pli pti lagrenn lo later.

³² Me kan i ganny senmen, i pouse e i vin pli gran plant dan zarden. I donn bann gran brans kot bann zwazo i kapab vin fer zot nik anba son lonbraz.”

³³ Ensi, Zezi ti anons Laparol par servi en kantite parabol. I ti fer li dan en fason ki son bann oditer ti kapab konpran.

³⁴ I pa ti koz avek zot san servi parabol, me kan i ti tousel avek son bann disip, i ti eksplik zot tou.

Zezi I Kalmi En Gro Tanpet

³⁵ Sa swar, Zezi ti dir zot, “Annou al lot kote lak.”

³⁶ Zot ti fer ale lafoul e bann disip ti anmenn Zezi dan kannot, kot i ti ete. Ti annan osi lezot kannot pre avek zot.

³⁷ En sel kou, en gro divan ti leve. Laroul ti tap avek kannot e delo ti konmans ranpli kannot.

³⁸ Zezi ti deryer pe dormi avek en kousen anba son latet. Bann disip ti lev li. Zot ti dir li, “Met! Nou pe koule! Ou pa pran ka?”

³⁹ Zezi ti leve e menas divan. I ti dir avek delo, “Silans! Reste trankil!” Alor, divan ti tonbe, e partou ti kalmi.

⁴⁰ Apre, Zezi ti dir son bann disip, “Akoz zot per? Zot napa ankor lafwa?”

⁴¹ En gran lafreyer ti pran zot tou e zot ti dir ant zot: Lekel sa zonm ki menm divan ek delo i obei li?