Liv Zob 7 - Labib An Kreol Seselwa

Zob I Plenny kont Bondye

¹ Lavi en zonm lo later, pa i zis lasoufrans? Son lavi pa i parey en labourer zournalye?

² Parey en lesklav ki rod lonbraz; parey en labourer ki pe esper son lapey.

³ Mwan, mon konn zis bann mwan dan maler. Mon pas mon bann lannwit dan lapenn.

⁴ Ler mon pe dormi, mon demande: Kan mon pou leve? Me lannwit i long; mon vire san pozisyon ziska bomaten.

⁵ Mon lekor i kouver avek lever ki parey lakrout later; mon lapo in fann e i enfekte avek boubou.

⁶ Mon lavi i pas pli vit ki navet en artizan; i fini san okenn lespwar.

⁷ Rapel byen ki mon lavi i zis en souf. Mon lizye pa pou zanmen war boner ankor.

⁸ Sa lizye ki pe vey lo mwan, pou nepli rekonnet mwan; ou pou rod mwan, me mon pou nepli la.

⁹ Parey en nyaz ki disparet dan lesyel, sa enn ki desann dan lemonn lanmor, i pa retourn lo later.

¹⁰ I pa retourn dan son lakaz, la kot personn pa pou rekonnet li.

¹¹ Pour sa rezon, mon pa pou ferm mon labous. Mon pou kontinyen koze avek langwas. Mon pou kontinyen plennyen dan mon dezespwar.

¹² Akoz ou fer vey mwan? Eski mwan mon losean, oubyen en bebet ki viv dan lanmer?

¹³ Kan mon al dormi mon dir: Mon lili ava konsol mwan, mon nat ava soulaz mon douler.

¹⁴ Alor ou fer mwan per avek en bann rev; ou teroriz mwan par bann vizyon.

¹⁵ Mon ti ava prefere ganny trangle; lanmor plito ki vin en leskelet!

¹⁶ Mon'n randi; mon pa pou viv pour touzour. Les mwan trankil, mon napa lontan ankor.

¹⁷ Ki zonm i ete pour ki ou pran ka avek li? Pour ki rezon ou fer sousi pour li?

¹⁸ Tou le bomaten ou egzamin li; tou lazournen ou teste li.

¹⁹ Kan ou pou arete vey mwan? Kan ou pou les mwan anval mon lasaliv?

²⁰ Si mon fer pese, ki sa i fer ou, gardyen zonm? Akoz ou viz zis mwan? Eski mon'n vin en fardo lo ou?

²¹ Akoz ou pa pardonn mon pese, e efas mon fot? Byento mon pou desann dan lapousyer; ou ava rod mwan, me mon pou nepli la.