Liv Zob 6 - Labib An Kreol Seselwa

Larepons Zob

¹ Alor, Zob ti reponn:

² A! Si ti posib pez mon lapenn, si tou mon bann maler ti ganny met lo en balans,

³ zot ti pou pli lour ki disab lanmer. Pour sa rezon ki mon pe koz an bonnavini.

⁴ Bondye liniver in pers mwan avek son bann dart; mon lespri in bwar zot pwazon. Lafreyer Bondye in pran pozisyon kont mwan.

⁵ Eski en bourik sovaz i braye devan zerb fre? Eski en bef i kriye ler i annan zerb devan li?

⁶ Lekel ki kapab manz keksoz fad, san disel? Eski blandef i annan gou?

⁷ Mon napa lapeti pour sa kalite manze. I donn mwan degou.

⁸ Si Bondye ti akord mwan sa ki mon demann li! Si i ti akonpli mon dezir!

⁹ Si Bondye ti aksepte kraz mwan! Si i ti met son lanmen lo mwan e fini avek mwan!

¹⁰ Sa ti ava en konsolasyon pour mwan. Mon ti pou sote avek lazwa, malgre mon douler ki pa donn mwan repo: Zanmen mon'n trai Parol Bondye sen.

¹¹ Ki lafors mon annan pour mwan espere? Ki mon lavenir, pour mwan pran pasyans?

¹² Eski mon lafors, i en ros? Eski lekor, i an bronz?

¹³ Vreman, mon nepli kapab siport sa lavi; mon'n perdi tou mon lafors.

¹⁴ En dimoun ki napa okenn senpati anver en zanmi, i napa okenn respe osi pour Bondye liniver.

¹⁵ Mon bann frer, zot trai mwan parey en larivyer sek ki disparet.

¹⁶ Ler liver i fini, laglas ek lannez i konmans fonn; bann larivyer i deborde.

¹⁷ Dan sezon lasaler, zot sek. Dan letan lasaler, soley i fer zot sek e zot disparet.

¹⁸ Bann karavann i sanz direksyon; zot al perdi dan dezer e zot disparet.

¹⁹ Karavann ki sorti Tema i rod delo. En lot ki sorti Saba pe swete war delo.

²⁰ Zot dezapwente akoz zot ti'n met zot konfyans. Kan zot ti arive, zot lespwar i disparet.

²¹ Zot in fer parey anver mwan: Zot per ler zot war mon maler.

²² Eski mon'n demann zot keksoz? Eski mon'n dir donn mwan en par zot byen?

²³ Eski mon dir delivre mwan dan lanmen mon lennmi, oubyen delivre mwan kont mon bann diktater?

²⁴ Eklersi mwan, e mon ava aret koze; Fer mwan konpran kote mon'n al mal.

²⁵ En rezonnman onnet i fer pwa. Me ki zot oule prouve par zot bann kritik?

²⁶ Eski zot krwar zot kapab kritik mon parol? Mon pe koz dan divan parey en zonm dezespere.

²⁷ Zot kapab mans lo latet en orfelen; menm fer larzan lo ledo zot zanmi.

²⁸ Aprezan, get mwan byen. Eski zot krwar mon pe koz manti devan zot?

²⁹ Mon sipliy zot, pa persiste akoz i pa byen. Pa kontinyen! Rekonsider sa akoz mon loner.

³⁰ Eski okenn mansonz in sorti dan mon labous? Eski mon konn disernen kisisa maler?